Van Bın: Qazaqstan — bizdiń eń mańyzdy, eń jaqyn kórshimiz

ASTANA. KAZINFORM – Qytaıdyń Medıa korporatsııasynyn (CMG) Eýrazııalyk bıýrosynyn dırektory Van Bın Astanada ótken SILK WAY STAR halyqaralyq vokaldyq baıqaýyna arnalǵan baspasóz konferentsııasynda Qazaqstannyń Qytaı úshin eń mańyzdy ári eń jaqyn kórshilerdiń biri ekenin atap ótti.

— Qazaqstan — bizdiń eń mańyzdy, eń jaqyn kórshimiz. Biz kóp jyldan beri tyǵyz yntymaqtastyq ornatyp, túrli salada eleýli nátıjelerge qol jetkizdik, — dedi ol.

Van Bın Silk Way Star jobasy eki elge de biregeı yntymaqtastyq tájirıbesin syılaıtynyn atap ótti.

— Biz tájirıbeli maman basqaratyn kásibı top qurdyq. Ol kóptegen jyldar boıy Qytaıdyń Kóktem merekesine arnalǵan gala-kontserttiń bas rejısseri boldy. Bul kontsertti álem boıynsha shamamen 2 mıllıard kórermen tamashalaıdy, — dedi ol.

Onyń aıtýynsha, Qytaı taraby baıqaýǵa eń úzdik oryndaýshyny jiberetinin aıtty.

— Qytaılyq qatysýshy Qazaqstandyq ánshi Dımash Qudaıbergenniń Qytaıdaǵy jetistigindeı tabysqa jetedi dep senemiz, — dedi Van Bın.

Sondaı-aq, Van Bın bıyl Qazaqstanda ótetin Silk Way Star jobasynyń tabysty júzege asaryna senim bildiridi.

—Bul joba aldaǵy maýsymdy Qytaıda ótkizýge berik negiz qalaıdy dep úmittenemiz. Osy maqsatqa jetý úshin biz birlese eńbektenetin bolamyz, - dedi ol.

Eske sala keteıik, Azııa memleketteri arasynda alǵash uıymdastyrylǵan mýzykalyq baıqaý Astanada ótedi.

Qazaqstan Respýblıkasy Prezıdentiniń Teleradıo Kesheni Prezıdenti men CMG medıakorporatsııasy uıymdastyryp otyrǵan baıqaýǵa 12 el, atap aıtqanda, Ázerbaıjan, Armenııa, Grýzııa, Malaızııa, Qazaqstan, Qytaı, Qyrǵyzstan, Mońǵolııa, Tájikstan, Túrikmenstan, Ózbekstan jáne Ońtústik Koreıa ókilderi qatysady.

Osy baıqaýda Qazaqstan atynan ánshi Alem óner kórsetetin boldy.