Valıýtalyq salymdaǵy depozıtter 9%-ǵa ósti – Ulttyq bank
«Bank júıesindegi depozıtter jyl basynan beri 27,7 trln teńgege deıin 2,3%-ǵa ulǵaıdy, onyń ishinde zańdy tulǵalardyń salymdary – 14,1 trln teńgege deıin 2,1%-ǵa, jeke tulǵalardiki 13,6 trln teńgege deıin 2,5%-ǵa artty», - dedi Ǵalymjan Pirmatov Úkimet otyrysynda.
Onyń aıtýynsha, valıýtalyq salymdar 10,6 trln teńgege deıin 8,9%-ǵa ósti, al ulttyq valıýtadaǵy depozıtter 17,1 trln teńgege deıin 1,5%-ǵa tómendedi. Nátıjesinde, depozıtterdiń dollarlanýy aqpan aıynda 38,4% bolǵan.
«Reseı bankterine jáne olardyń Qazaqstandaǵy enshiles uıymdaryna sanktsııalardyń kúsheıýi atalǵan bankterdiń jumysyna, atap aıtqanda dollardaǵy, eýrodaǵy aýdarymdar men kartalyq operatsııalarǵa áser etti. Visa jáne Mastercard halyqaralyq tólem júıeleri olardyń kartalary boıynsha operatsııalarǵa shekteý qoıdy. Ulttyq bank bankterdiń óz klıentterine qyzmet kórsetýi úshin jaǵdaı jasaýda. Reseı bankteriniń enshiles bankteri shekteýsiz túrde qolma-qol teńgemen qamtamasyz etilýde.
Atalǵan bankterge engizilgen sanktsııalar men shekteýler qazaqstandyq bankterdiń qyzmetine baılanysty emes jáne olarǵa yqpal etpeıdi. Ulttyq bank jaǵdaıdyń damýy men olardyń naryqtarǵa yqpalyn únemi qadaǵalap, sanktsııalardyń Qazaqstannyń qarjy júıesine áser etý dárejesin baǵalap otyrady, sondaı-aq qarjy jáne baǵa turaqtylyǵyn qamtamasyz etý úshin shara qabyldaýdy jalǵastyrady», - dedi Ǵalymjan Pirmatov.
Buǵan deıin Ǵ. Pirmatov Qazaqstanda iskerlik belsendilik ındeksi teris kórsetkishke aýysqanyn jáne jyl boıy syrtqy ınflıatsııalyq jaǵdaı da qolaısyz bolatynyn eskertken edi. Al ınflıatsııa sońǵy alty jylda birinshi ret 12%-ǵa deıin kóterildi. Azyq-túlik taýarlary ınflıatsııaǵa eń kóp úles qosqan, olardyń ósimi 10%-dan 15,4%-ǵa deıin jedeldedi . Sonymen birge, teńge baǵamy naýryzdaǵy qubylmaly jaǵdaıdan keıin nyǵaıyp keledi.
