Valıýtalyq baqylaýdy Úkimet ózine alýy kerek - Májilis depýtaty
ASTANA. QazAqparat - Májilis depýtaty Omarhan Óksikbaev valıýtalyq baqylaýdy Úkimet ózine alýy kerektigin usyndy, dep habarlaıdy QazAqparat.
«Biz qoǵamdyq múlkimizdi eselendiremiz, solardyń tıimdiligin arttyramyz desek, baqylaý júıesin naqtylap, jetildirip ári durys jolǵa qoıa bilýimiz kerek. Búginde tıisti zańdy qabyldap, ádisnamany rettedik, biraq osy sharada áli de bolsa bizdiń shoǵyrlandyrý máselemiz tolyq sheshilgen joq. Erekshe atap ótetin máselege toqtalsam, qoǵamdyq qarjyny, qoǵamdyq múlikti saqtaý máselesi bizdiń nazarymyzdan tys qalyp qoıǵan. Baqylaý ádisnamasy men baǵdarlamasynda bul máseleler tórt júıeniń bireýine de kirmeıdi. Biz eseptik baqylaýdy, aýdıtti nazarǵa alyp, tıimdilikke bet burdyq, al endi naqty qarjy men memlekettik múliktiń saqtandyrylýy nazardan tys qalyp qoıǵan sııaqty. Bul jerde qarjy talan-tarajǵa túsip, ıaǵnı túgendeý júrgizilgen kezde kemshilikter shyǵyp jatyr. Osy rette biz ishki aýdıtti osy máselege qaraı burýymyz kerek. Óıtkeni ol syrtqy aýdıttiń emes, ishki aýdıttiń tikeleı qyzmetine engizetin kez keldi jáne sony ádisnamaǵa da salý kerek de oılaımyn», - dep toqtaldy depýtat Parlament Májilisinde ótken Úkimet saǵatynda.
Munymen qosa, ol valıýtalyq baqylaýǵa qatysty tıisti usynys jasady.
«Ekinshi kúrdeli másele - ol bizdiń valıýtalyq baqylaý. Elbasymyz ár elden ınvestor tartyp, ekonomıkamyzǵa ınvestıtsııa salsyn dep júrgende, biz bar qarjymyz ben valıýtamyzdy shashyp otyrsaq, onda elge kúlki bolǵannan basqa ne qalady. Qazir Ulttyq banktiń sońǵy esebine qaraǵanda, 5 mıllıard dollarǵa jýyq bizdiń debıtorlyq qaryz tur. Syrtqa ketken valıýta. Sonyń jartysyna jýyǵy merziminen asyp ketken debıtorlyq qaryz. Mine, osy jerde úlken kúmán týǵyzatyn máseleler jatyr. Kim buny tekseredi? Búgingi tańda valıýtalyq baqylaýdy Ulttyq banktiń ózine berip qoıdyq. Ulttyq bank osy valıýtalyq operatsııanyń operatory. Ol osy jumystardyń barlyǵyn rettep otyratyn organ. Al endi sony baqylaýdy da soǵan berdik. Buryn Úkimet bul qyzmetti ózi atqaratyn. Qazir Úkimet osydan nege ketip qalǵany men úshin úlken suraq. Meniń oıymsha, osy máseleni sheshetin kez kelgen sııaqty. Úkimet ózine valıýtalyq baqylaýdy alý kerek. Atap aıtqanda, bul usynysty qolǵa alsa, biz osy máselede ashyqtyqty jáne naqtylyqty kórgen bolar edik»,- dedi depýtat.
