Valıýtalyq baǵam naryǵyn turaqtandyrýǵa qysqa merzimdi perspektıvada qol jetkizýge bolady - Q. Kelimbetov
ASTANA. QazAqparat - Valıýtalyq baǵam naryǵyn turaqtandyrýǵa qysqa merzimdi perspektıvada qol jetkizýge bolady. Bul týraly búgin Parlament Májilisiniń jalpy otyrysynda QR Ulttyq Banki Tóraǵasy Qaırat Kelimbetov osylaı málimdedi.
Eske salaıyq, jalpy otyrysta depýtattar «Astana» halyqaralyq qarjy ortalyǵy týraly» zań jobasyn talqylaǵan bolatyn.
Jıyn barysynda depýtat Jumataı Álıev elimizdiń dollarsyzdandyrý máselesin kótergen bolatyn. Bul rette depýtat talqylanyp otyrǵan qujat dollarǵa táýeldilikti odan saıyn arttyryp jibermeı me, degen qaýpin alǵa tartty. «Investorlar osy zań jobasyn qabyldaǵannan soń elge kelýi kútiledi. Bálkim olar teńgeni satyp alýǵa yntalanyp, ulttyq valıýtany kúsheıtermiz? Bizdi osy másele tolǵandyrady, dollarsyzdandyrýǵa bul zań jobasy qalaı áser etedi?» - dep surady depýtat J. Álıev.
Óz kezeginde Ulttyq Bank basshysy aǵymdaǵy jaǵdaıǵa zań jobasynyń áseri týraly pikirimen bólise kele, bul qujat elimizge keminde 50 jyl qyzmet etetinin alǵa tartty. «Búgingi qıyndyqtar aılarǵa, bálkim jyldarǵa jalǵasýy múmkin, biraq 50 jylǵa sozylmaıdy. Álemdik ekonomıka birde tómen quldyrap, birde joǵary sekirip turatyn tsıklǵa ıe. Biz 1991 jyldan beri álemdik ekonomıkanyń bólshegine aınaldyq, jahandyq oıyn tártibiniń arasynda júrmiz. Buǵan deıingi on jyl ishinde AQSh dollary «báseńdep» ol bárimizge jaǵymdy boldy, al endi «qymbat dollar dáýirine» kezikkenimiz týraly aıtylyp jatyr», - dep túsindirdi Bas bankır.
Bul rette Qaırat Kelimbetov álem boıynsha barlyq valıýta dollarǵa qarsy álsizdik tanytyp otyrǵanynan mysaldar keltirdi. Máselen, onyń aıtýynsha, reseı rýblinen bastap, Avstralııa, Kanada dollary da AQSh valıýtasyna qarsy qubyldy, Norvegııanyń kronosy da teńselgen. «Myzǵymas rezervtik valıýta» retinde aıtylyp júrgen qytaı ıýany da devalvatsııaǵa ushyrady.
«Sondyqtan da, búgingi ahýaldyń ózi dollarǵa táýeldilik elementin kórsetedi. Bizdiń ekonomıka da solaı, biz munaı satamyz, al ol dollarmen baılanysty. Osyǵan oraı biz valıýtalyq baǵam naryǵyn turaqtandyrýmen aınalysyp jatyrmyz. Sonymen qatar, biz buǵan qysqa merzimdi perspektıvada qol jetkizýge bolady dep sanaımyz», - dedi UB basshysy.
«Eshkim de munaıǵa baǵanyń erteń qandaı bolatynyn aıta almaıdy. Al munaıǵa baǵa 60-70-80 dollar bolyp ósse, onda teńge de nyǵaıady. Kerisinshe, munaı baǵasy tómendese onda qoldan keler qaıran joq, bárimiz álemde oryn alyp jatqan jaǵdaıǵa saı ómir súretin bolamyz. Degenmen, bul - qysqamerzimdik problema», - dedi Q. Kelimbetov.
