Valıýtalyq depozıtter kimderge tıimdi
ASTANA. KAZINFORM – Qazaqstanda valıýtalyq depozıtter boıynsha jańa usynystar osy aıdyń sońyna deıin paıda bolýy múmkin. Bul týraly Ulttyq Banki tóraǵasynyń orynbasary Aqyljan Baımaǵambetov aıtty.
Onyń málimetinshe, qazir barlyq bankterge valıýtalyq depozıtter boıynsha jańa sharttar usynýǵa múmkindik berilgen. Bankter qazirgi ýaqytta óz usynystaryn baǵalap jatyr.
- Aıdyń sońyna deıin bank naryǵynda qandaı da bir usynystardy kóremiz dep oılaımyn. Qazir naqty bir bankti nemese birneshe bankti atap, jarnamalaǵym kelmeıdi. Muny naryqtan kórýge bolady, – dedi Baımaǵambetov.
Onyń aıtýynsha, bankter valıýtalyq depozıtter boıynsha mólsherlemeni qandaı sharttarmen usynatynyn ózderi anyqtaıdy. Máselen, depozıttiń eń tómengi somasy, barlyq depozıtterge qoldanylýy nemese shotta belgili bir mólsherdegi qarajattyń saqtalýyna qoıylatyn talaptar belgilenýi múmkin.
- Jańa ereje boıynsha mólsherlemesi joǵary bolýy múmkin ónimder merzimi 12 aıdan asatyn jınaq depozıtterine qatysty. Qazir bankter osy másele boıynsha sheshim qabyldap jatyr. Bálkim, keıbir bankter mundaı usynystardy klıentterine jasap qoıǵan shyǵar. Biraq aıdyń sońyna deıin naryqta osyndaı birneshe usynys paıda bolady dep oılaımyn, – dedi ol.
Ulttyq bank ókili azamattarǵa jınaqty negizinen tabys taýyp, shyǵyn jasaıtyn valıýtada saqtaýdy usyndy.
- Biz jalpy alǵanda jınaqty teńgemen jáne shyǵyn jasaıtyn valıýtada saqtaýǵa keńes beremiz. Eger adam Qazaqstanda turyp, tabysyn teńgemen alyp, shyǵynyn da teńgemen jasasa, onda teńgelik depozıtter jınaq úshin yńǵaıly qural dep oılaımyn, – dedi Baımaǵambetov.
Sonymen qatar onyń aıtýynsha, shetel valıýtasynda qarajat jınaý keıbir azamattar úshin tıimdi bolýy múmkin.
- Mysaly, balalary shetelde oqıtyn adamdar bar. Olar qarajatyn shetel valıýtasynda jınaýy múmkin. Sondaı-aq aldaǵy ýaqytta valıýtalyq táýekeli bar iri shyǵyndardy josparlap otyrǵan azamattar úshin de bul yńǵaıly bolýy múmkin, – dedi ol.
Spıkerdiń aıtýynsha, valıýtalyq depozıtter boıynsha jańa múmkindik bankterge klıentterdiń suranysyna qaraı ónimder usyný úshin berilip otyr.
- Bul naryqtyq másele. Retteýshi tarapynan bankterge depozıt mólsherlemesin mindetti túrde kóterý týraly talap joq. Munda suranys pen usynys óz ornyn tabady. Eger suranys bolsa jáne bankterdiń qyzyǵýshylyǵy baıqalsa, tıisti usynystar paıda bolady, – dep atap ótti Ulttyq bank ókili.
Buǵan deıin áleýmettik tólem, jumys izdeý jáne depozıtterge qatysty jańa erejeler týraly jazǵan edik.
