Valıýta salasyndaǵy retteý men baqylaý Qazaqstanǵa tıimdi bolady - sarapshy
ASTANA. QazAqparat - «Valıýtalyq retteý jáne valıýtalyq baqylaý týraly» jańa zańǵa sáıkes, Qazaqstannyń valıýta naryǵynda birqatar ózgerister bolady. Bul pikirdi QR Tuńǵysh Prezıdenti Qory janyndaǵy Álemdik ekonomıka men saıasat ınstıtýtynyń sarapshysy Aıjan Muqyshbaeva bildirdi, dep habarlaıdy QazAqparat tilshisi.
«Birinshiden, qazaqstandyq kontragenti bar sheteldik uıymdardyń fılıaldary teńgemen eseptesetin bolady. Bul ózgeris 2020 jylǵa qaraı Qazaqstan Dúnıejúzilik saýda uıymyna kiretindikten sheteldik bankterdiń fılıaldary men saqtandyrý uıymdary Qazaqstannyń ishki naryǵyna kirýimen baılanysty», - dedi Aıjan Muqyshbaeva.
«El ishinde shetel valıýtasyndaǵy tólemderdiń ulǵaıýy qaýpin azaıtý úshin bul sheshim der kezinde qabyldanyp otyr», dep atap ótti ol.
«Ekinshiden, kapıtaldyń shyǵarylýyna baǵyttalǵan operatsııalar boıynsha valıýtalyq baqylaý kúsheıedi. Jańa zańda elden shyǵarylatyn qarjynyń belgileri bar valıýtalyq operatsııalar tizimi anyqtalǵan. Mundaı operatsııalarǵa qazaqstandyq esepshotqa qarajat túsirýdi kózdemeıtin qarjylyq qaryzdardy, 720 kúnnen astam merzimge paıyzsyz zaem jáne kommertsııalyq kredıtterdi usyný, qaıtarý merzimimen birge 720 kúnnen asatyn eksportty nemese ımportty tóleý boıynsha operatsııalary kiredi», - dedi sarapshy.
«Úshinshiden, Qazaqstan aýmaǵynda valıýtalyq qundylyqtardyń aınalymynyń tártibi ózgerdi. 2019 jyldyń 1 shildesinen bastap, banktik emes aıyrbas pýnktteri Ulttyq bank shyǵarǵan altyn quımalardy saýdalaı alady. Bul óz kezeginde halyq tarapynan dollarǵa degen suranystyń tómendeýine, qarjy naryǵyn dollarsyzdandyrýǵa múmkindik beredi», - dedi Aıjan Muqyshbaeva.
Sarapshynyń aıtýynsha, halyqtyń dáýletti toby úshin altyn quımalar uzaq merzimdi ınvestıtsııalaýdyń taǵy bir quraly bolmaq.
«Jalpy alǵanda, engizilgen ózgertýler Qazaqstan aýmaǵynda sheteldik valıýtamen eseptesýdi azaıtady jáne elden aqsha áketýge tosqaýyl bolady», - dep óz sózin túıindedi Aıjan Muqyshbaeva.
Eske sala ketsek, 4 shilde kúni Qazaqstan Respýblıkasynyń Prezıdenti Nursultan Nazarbaev valıýtalyq retteýdi jáne baqylaýdy jetildirýge baǵyttalǵan «Valıýtalyq retteý jáne valıýtalyq baqylaý týraly» Qazaqstan Respýblıkasynyń Zańyna qol qoıdy.
Valıýtany lıberaldy retteý ustanymdary saqtalatyndyqtan zańnyń qabyldanýy qarapaıym halyqqa keri áserin tıgizbeıdi.
