Valıýta naryǵyndaǵy ahýal: teńge jeltoqsanda nyǵaıdy
ASTANA. KAZINFORM - 2025 jylǵy jeltoqsan aıynyń qorytyndysy boıynsha teńge baǵamy 1 AQSh dollary úshin 505,73 teńgege deıin 1,3 paıyzǵa nyǵaıdy. Bul týraly Ulttyq banktiń valıýta naryǵyna qatysty aqparattyq habarlamasynda aıtylǵan.
Qazaqstan qor bırjasyndaǵy saýda-sattyqtyń ortasha kúndik kólemi bir aı ishinde 280 mln AQSh dollarynan 359 mln AQSh dollaryna deıin artty. Jeltoqsan aıyndaǵy saýda-sattyqtyń jalpy kólemi 7,9 mlrd AQSh dollaryn qurady.
Jalpy 2025 jyldyń qorytyndysy boıynsha teńge baǵamy 1 AQSh dollary úshin 525,10 teńgeden 505,73 teńgege deıin nyǵaıyp, jyldyq ósim 3,7 paıyzdy qurady. Valıýta naryǵyndaǵy saýda-sattyqtyń jıyntyq kólemi jyldyq eseppen 15 paıyzǵa ulǵaıyp, 63 mlrd AQSh dollaryna jetken.
Respýblıkalyq bıýdjetke transfertterdi qamtamasyz etý jáne «Taldyqorǵan – Úsharal» magıstraldyq gaz qubyryn salý jónindegi ınfraqurylymdyq jobany qarjylandyrý maqsatynda 2025 jylǵy jeltoqsanda Ulttyq qordan 400 mln AQSh dollaryna valıýta satylǵan. Bul jalpy saýda kóleminiń shamamen 5 paıyzyna nemese kúnine orta eseppen 18 mln AQSh dollaryna teń. Jalpy alǵanda, 2025 jyly Ulttyq qordan 8,2 mlrd AQSh dollaryna valıýta satyldy.
Úkimettiń respýblıkalyq bıýdjetke transfertterdi konvertatsııalaý jónindegi aldyn ala boljamdy ótinimderine sáıkes, 2026 jylǵy qańtar aıynda Ulttyq bank Ulttyq qordan 350-450 mln AQSh dollary kóleminde valıýta satady dep kútilip otyr.
- Aınalaý operatsııalary aıasynda jeltoqsan aıynda 475 mlrd teńge alyndy. 2025 jyly altyn-valıýta rezervterinen aınalaý operatsııalary arqyly satylǵan valıýtanyń kólemi 7 mlrd AQSh dollaryn qurady.
2025 jyly alynbaı qalǵan ótimdilikti eskere otyryp, aınalaý operatsııalary men memlekettiń basym quqyqty júzege asyrýynan týyndaıtyn boljamdy emıssııany beıtaraptandyrý, sondaı-aq altyn baǵasynyń eleýli ósýi aıasynda 2026 jylǵy birinshi toqsanda shamamen 1,1 trln teńge balamasynda shetel valıýtasyn satý josparlanyp otyr, - delingen aqparatta.
Ulttyq bank Ulttyq qor qarajatymen operatsııalar júrgizý kezinde jáne aınalaý tetigin iske asyrý barysynda naryqtyq beıtarap qaǵıdatty ustanatynyn atap ótti. Bul shetel valıýtasyn turaqty ári birkelki satýdy kózdeıdi.
Jeltoqsan aıynda Ulttyq bank valıýtalyq ınterventsııa júrgizgen joq. Sonymen qatar kvazımemlekettik sektor sýbektileriniń valıýtalyq túsiminiń bir bóligin mindetti satý normasy aıasynda ótken aıda shamamen 315 mln AQSh dollary satylǵan.
BJZQ valıýtalyq aktıvteriniń úlesi 40 paıyzdan joǵary ekenin eskere otyryp jáne buryn jarııalanǵan josparǵa sáıkes, jeltoqsan aıynda zeınetaqy aktıvteriniń ınvestıtsııalyq portfeline AQSh dollaryn satyp alý júrgizilgen joq. Qańtar aıynda da valıýta satyp alý josparlanbaıdy.
Ulttyq bank valıýta naryǵynda júrgiziletin operatsııalar týraly aqparatty ashyq túrde jarııalaýdy jalǵastyratynyn málimdedi. Qysqamerzimdi kezeńde teńge baǵamynyń dınamıkasy naryq qatysýshylarynyń kútýlerine, toqsandyq salyq tólemderine, álemdik naryqtardaǵy jaǵdaıǵa jáne geosaıası ahýalǵa baılanysty bolmaq. Ulttyq bank altyn-valıýta rezervteriniń saqtalýyn qamtamasyz etýge baǵyttalǵan ıkemdi aıyrbas baǵamy rejımin ustanýdy jalǵastyrady.
Aıta keteıik, Ulttyq bank zeınetaqy jınaǵyna qatysty keńes berdi.