Valıýta naryǵy: Ulttyq qordan maýsymda qansha dollar satyldy
ASTANA. KAZINFORM – Maýsym aıynda teńge baǵamy 1,7%-ǵa álsirep, 1 AQSh dollary úshin 519,73 teńge deńgeıinde qalyptasty. Aıdyń qorytyndysy boıynsha KASE-degi saýda-sattyqtyń ortasha kúndik kólemi 238 mln AQSh dollarynan 235 mln AQSh dollaryna deıin qysqarǵan. Jalpy saýda kólemi - 4,7 mlrd dollar. Bul týraly Ulttyq banktiń málimdemesinde aıtylady.
Ulttyq qordan 800 mln dollar satyldy
Maýsym aıynda respýblıkalyq bıýdjetti transferttermen qamtamasyz etý úshin Ulttyq qordan 800 mln AQSh dollary kóleminde valıýta satyldy. Bul - jalpy saýda kóleminiń 17%-y nemese kúnine orta eseppen 40 mln dollar.
Shildede bul kórsetkish azdap tómendeýi múmkin degen boljam jasalady, shamamen 600–700 mln dollar kóleminde valıýta satylmaq.
«Aınalaý» operatsııalary jandandy
Maýsymda «aınalaý» tetigi (baǵa ne mólsherleme aıyrmasynan paıda tabý úshin ártúrli naryqta bir ýaqytta saýda jasaý – red.) arqyly 213 mlrd teńge alynǵan. Shildede bul baǵytta shamamen 290 mlrd teńge balamasynda valıýta satý josparlanyp otyr. Mundaı operatsııalar kezinde retteýshi organ naryqtyq beıtarap qaǵıdatqa súıenip, valıýta satylymyn turaqty jáne birkelki deńgeıde júrgizedi.
Aıta keterligi, maýsymda Ulttyq Bank tarapynan valıýtalyq ınterventsııalar júrgizilgen joq.
Zeınetaqy aktıvteri úshin shetel valıýtasy satyp alyndy
Biryńǵaı jınaqtaýshy zeınetaqy qory aktıvterin basqarýshy retinde Ulttyq bank zeınetaqy aktıvteriniń valıýtalyq úlesin keminde 40% deńgeıinde ustap turý úshin 188 mln dollar satyp alǵan. Bul - jalpy saýda kóleminiń shamamen 4%-y. Shildede josparly satyp alý kólemi 100 mln dollardan aspaıdy.
Kvazımemlekettik sektor 322 mln dollar satty
Al kvazımemlekettik sektor sýbektileri valıýtalyq túsimniń bir bóligin mindetti satý normasyna sáıkes 322 mln dollar kóleminde valıýta satty.
Teńge baǵamynyń bolashaǵy qandaı?
Ulttyq bank teńge baǵamyna qysqamerzimdi áser etetin faktorlar retinde naryq qatysýshylarynyń boljamy, salyq kezeńderi, syrtqy naryqtardaǵy ahýal jáne geosaıası ózgeristerdi atap ótedi.
Retteýshi organ teńge baǵamynyń ıkemdiligin saqtaı otyryp, valıýta naryǵyndaǵy teńgerimsizdiktiń aldyn alý jáne altyn-valıýta rezervterin saqtaý strategııasyn ustanatynyn málimdedi.
