Valıýta baǵamynyń qubylýy tarıftiń kóterilýine ákeldi – baılanys operatory

NUR-SULTAN. QazAqparat – 8 mamyrda «Beeline Qazaqstan» kompanııasy óz abonentterine tarıfterdiń kóterilgenin habarlaǵan bolatyn. Baılanys operatory «QazAqparattyń» saýalyna joldaǵan jaýapta sol sheshimderiniń sebebin túsindirdi, dep habarlaıdy «QazAqparat» tilshisi.

«2020 jyly qazaqstandyqtar «Beeline» baılanys operatory arqyly aı saıyn 12,6 Gb ınternet shyǵyndaǵan. 2021 jyly bul kórsetkish 16 Gb jetip, 26% artqan. Tipti, keıbir óńirlerde qoldanýshylardyń ınternet tutyný shyǵyny 67% artty. Osynyń bári jeliniń júktemesine salmaq salady», - dep jazady kompanııa.

Baılanys operatorynyń málimeti boıynsha, júkteme udaıy ósip jatqan shaqta ınternettiń jyldamdyǵy men sapasyn saqtaý úshin ınternet jabynyn keńeıtý jáne syıymdylyqty arttyrýǵa turaqty negizde ınvestıtsııa salynyp jatyr.

«Bir ǵana bazalyq stansanyń quny montaj jumystarymen birge 100 mln teńgege deıin shyǵýy múmkin. 2021 jyly «Beeline Qazaqstannyń» shyǵyny 57,7 mlrd teńge boldy. Bul jerde kompanııa jabyn aımaǵyn keńeıtýge qajet qondyrǵylardy sheteldik óndirýshilerden satyp alatynyn eskerý qajet. Demek, qondyrǵyny dollarmen satyp alsa, abonent tólemderin teńgemen qabyldaıdy, ıaǵnı ınternet sapasy men jyldamdyǵyn ustap turý shyǵyndary valıýta baǵamy qubylǵan saıyn kóbeıip barady», - delingen jaýapta.

Buǵan deıin QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın bıyl 140 aýylda ınternet sapasy jaqsartylatynyn aıtqan bolatyn.