Valıýta baǵamynyń qubylýy Ulttyq qordan balalarǵa beriletin aqsha kólemine áser etpeıdi – Ulttyq bank

ASTANA. KAZINFORM –  Ulttyq banktiń tóraǵasy Tımýr Súleımenov valıýta naryǵyndaǵy boljamsyzdyq «Ulttyq qor – balalarǵa» baǵdarlamasyna qalaı áser etetinin aıtty.

- Bul jerde Ulttyq qor ınvestıtsııalyq tabysynyń 50 paıyzyn dollar kúıinde shottarǵa aýdarady. Bala 18-ge tolǵanda ǵana ony zańda kórsetilgen jaǵdaılarǵa paıdalaný úshin sheship alady. Ulttyq qordyń búkil esebi dollarmen júrgiziletindikten sáıkesinshe valıýta baǵamynyń ózgerýinen oǵan tıetin áser joq. Ulttyq qordyń ınvestıtsııalyq tabysy qandaı bolatynyn naqty boljaý qıyn. Óıtkeni qazir naryq qubylyp tur, birde tússe, birde kóteriledi. S&P, NASDAQ sııaqty quraldardyń ózi qyzyl túske ótip, qaıta «jasylǵa» oralǵanyn kórdińizder. Biz oǵan áser ete almaımyz, bul – jahandyq naryqtar. Sondyqtan qazirgi jaǵdaı qalypqa túsken kezde, naryqta ósim bolady, - dedi ol Ulttyq banktiń kezekti baspasóz máslıhatynda.

Tımýr Súleımenov «Ulttyq qor – balalarǵa» baǵdarlamasynyń búkil esebi dollarmen júrgiziletinin qaıtalap aıtty.

- Sáıkesinshe valıýta baǵamynyń qozǵalysy balalardyń tabysyna eshqandaı da áser etpeıdi, - dedi Ulttyq bank basshysy.

Aıta keteıik, búgin Ulttyq bank bazalyq mólsherleme týraly jańa sheshim qabyldady.