Valıýta baǵamyna aptalyq sholý: teńge nyǵaıa tústi
ASTANA. KAZINFORM – Qarashanyń ekinshi aptasynda teńgeniń AQSh dollary men eýroǵa, Reseı rýbli men Qytaı ıýanine qatysty baǵamy nyǵaıa tústi. Dollardyń resmı baǵamy bir aptada 8,25 teńgege tómendep, 443,62 teńge boldy. Alaıda qarjy naryǵyna qatysýshylar jyl sońyna qaraı teńge álsireıdi dep boljaıdy. Qazaqstan qarjygerleri qaýymdastyǵynyń qarashadaǵy saýalnamasynda jeltoqsannyń basyndaǵy dollar baǵamy 462,4 teńge bolady degen boljam aıtylǵan.
Teńge negizgi valıýtalarǵa qatysty nyǵaıdy
13 qarashada Ulttyq bank belgilegen resmı baǵam boıynsha bir dollar 443,62 teńge, eýro 492,24 teńge, Reseı rýbli 5,36 teńge, Qytaı ıýani 66,53 teńge boldy.
Aldyńǵy aptanyń qorytyndys saýda kúnine qaraǵanda dollar 8,25 teńgege nemese 1,83 paıyz arzandady. Eýro 15,07 teńgege, rýbl 17 tıynǵa, ıýan 1,24 teńgege tómendedi.
Eýronyń 500 teńgelik mejeden tómen túsýi de osy aptadaǵy ózgeristerdiń biri boldy. Apta sońynda negizgi tórt valıýtanyń bári teńgege qatysty arzandady.
Bir aıda jáne bir jylda dollar qanshaǵa arzandady?
Qarashadaǵy ózgeristi buǵan deıingi kezeńdermen salystyrǵanda da teńgeniń nyǵaıǵany baıqalady.
13 qazanda Ulttyq banktiń resmı baǵamy boıynsha dollar 451,31 teńge bolǵan. Bir aıda amerıkalyq valıýta 7,69 teńgege nemese 1,7 paıyz arzandady.
Al byltyrǵy 13 qarashada dollar 524,65 teńge turǵan. Bıylǵy kórsetkishpen salystyrǵanda aıyrmashylyq 81,03 teńge. ıAǵnı bir jylda dollardyń teńgege shaqqandaǵy quny 15,44 paıyz tómendedi.
Bul teńgeniń bir jylda aıtarlyqtaı nyǵaıǵanyn kórsetedi. Buǵan tek ishki valıýta naryǵyndaǵy jaǵdaı ǵana emes, munaı baǵasy, eksport túsimi, shetel valıýtasyna suranys jáne Ulttyq qordan túsetin qarajat ta teńge baǵamyna áser etti.
Qarjygerler boljamy
Teńge qarashada nyǵaıǵanmen, Qazaqstan qarjygerleri qaýymdastyǵynyń qarashadaǵy saýalnamasyna qatysqan sarapshylar jyl sońyna qaraı dollar qymbattaıdy dep kútedi.
Olardyń boljamynsha, jeltoqsannyń basynda dollardyń ortasha baǵamy 462,4 teńge bolady. Qazan aıyndaǵy saýalnamada bul kórsetkish 456,5 teńge dep baǵalanǵan. ıAǵnı bir aı ishinde sarapshylar boljamyn 5,9 teńgege kótergen.
13 qarashadaǵy resmı baǵammen salystyrǵanda 462,4 teńgege deıingi yqtımal ósim 18,78 teńge nemese 4,23 paıyz degen sóz..
Aldaǵy 12 aıǵa arnalǵan boljam boıynsha dollar baǵamy 499,4 teńge deńgeıinde baǵalanyp otyr. Qazan aıyndaǵy saýalnamada sarapshylar bir jyldan keıin dollar 502,6 teńge bolady dep boljaǵan. Demek, qysqa merzimde dollardyń qymbattaýyn kútkenimen, bir jyldyq boljamdaryn sál jaqsartqan.
Inflıatsııa men bazalyq mólsherleme
Qarjygerler ınflıatsııa boıynsha boljamyn da kóterdi. Olardyń baǵalaýynsha, aldaǵy 12 aıda ınflıatsııa 9,9 paıyz bolýy múmkin. Qazan aıyndaǵy saýalnamada bul kórsetkish 9,7 paıyz bolǵan.
Bazalyq mólsherlemege qatysty sarapshylardyń basym bóligi Ulttyq bank 4 jeltoqsandaǵy otyrysynda qazirgi 15,75 paıyzdyq deńgeıdi saqtaıdy dep esepteıdi. Saýalnamaǵa qatysqandardyń 65 paıyzy osyndaı pikir bildirgen. Qalǵan 35 paıyzy mólsherleme 15,5 paıyzǵa deıin tómendeýi múmkin dep sanaıdy.
Munaı baǵasy men ekonomıkalyq ósim boljamy
Sarapshylar Brent markaly munaıdyń aldaǵy 12 aıdaǵy baǵasyn barreline 93,4 dollar dep baǵalap otyr. Qazan aıyndaǵy boljam 79 dollar bolǵan.
Qazaqstan ekonomıkasynyń ósimine qatysty boljam da 4,4 paıyzdan 4,5 paıyzǵa kóterildi.
Qarjy sarapshysy Andreı Chebatorev Qazaqstan munaıynyń Brent markaly munaıǵa qaraǵanda ústeme baǵamen satylyp jatqanyn aıtady.
- Qymbat munaı dollar baǵamy 540 teńge degen mejemen eseptelgen bıýdjet tapshylyǵyn jabýǵa kómektesip otyr, – deıdi sarapshy.
Eske salsaq, 12 qarasha kúndizgi saýda-sattyq qorytyndysy boıynsha dollardyń ortasha baǵamy 1,2 teńgege túsip, 443,62 teńge boldy.
