Valıýta baǵamyna aptalyq sholý: qazan aıynda dollar 2,9 paıyz qymbattady
ASTANA. KAZINFORM – Qazan aıynyń sońǵy aptasynda teńge baǵamy qubylyp, juma kúni birshama nyǵaıdy. 27 qazanda 451,05 teńge bolǵan AQSh dollary 29 qazanda 457,09 teńgege deıin kóterilip, 30 qazanda 453,71 teńgege tústi. Alaıda apta sońyndaǵy tómendeý ulttyq valıýtanyń aı boıǵy álsireý úrdisin ózgertken joq, qazannyń basymen salystyrǵanda dollar 12,85 teńgege qymbattaǵan.
Teńge baǵamy teńselip tur
Apta basynan beri dollar baǵamy birneshe ret ózgerdi. 28 qazanda ol 455,63 teńgege jetse, kelesi kúni taǵy 1,46 teńgege ósip, 457,09 teńge boldy. Juma kúni dollar bir kúnde 3,38 teńgege arzandady. Osylaısha, apta qorytyndysynda dollar 27 qazandaǵy deńgeıden 2,66 teńgege joǵary qaldy.
Ózge valıýtalar da apta ishinde qymbattap, jumada arzandady. 29 qazanda eýro 508,42 teńge, Qytaı ıýani 68,56 teńge, Reseı rýbli 5,67 teńge boldy. 30 qazanda olardyń resmı baǵamy tıisinshe 505,80, 68,11 jáne 5,63 teńgege deıin tómendedi. Bir kúnde eýro 2,62 teńgege, ıýan 45 tıynǵa, rýbl 4 tıynǵa arzandady.
Valıýta naryǵyndaǵy aptalyq qozǵalysty baǵalaǵanda Ulttyq banktiń bazalyq mólsherleme jónindegi sheshimin de eskergen jón. 23 qazanda retteýshi organ mólsherlemeni 16,25 paıyzdan 15,75 paıyzǵa deıin tómendetti. Ulttyq bank bul sheshimdi ınflıatsııanyń baıaýlaýymen baılanystyrdy. Óıtkeni qyrkúıekte jyldyq resmı ınflıatsııa 9,3 paıyz bolǵan. Alaıda valıýta baǵamyn tek Ulttyq bank sheshimimen túsindirý azdyq etedi. Oǵan syrtqy naryqtaǵy ahýal, eksport túsimi, valıýtaǵa suranys pen usynys ta áser etedi.
27-29 qazan aralyǵynda Qazaqstan qor bırjasyndaǵy saýda kólemi 868,1 mln dollar, 14,52 mln eýro, 7,96 mlrd rýbl jáne 189,1 mln ıýan bolǵan. 30 qazanda Qazaqstan qor bırjasynda AQSh dollarymen jasalǵan mámileler kólemi 258,8 mln dollarǵa jetti. Eýro boıynsha 4,43 mln eýroǵa, Qytaı ıýani boıynsha 16,6 mln ıýanǵa saýda jasaldy. Reseı rýblimen jasalǵan mámilelerdiń jalpy kólemi 2,58 mlrd rýbl boldy.
Qazan aıynyń basynda (1 qazanda) AQSh dollary 440,86 teńge bolǵan. Aı ishinde baǵam birde tómendep, birde kóterildi. 6 qazanda 454,98 teńgege jetken dollar keıin 8 qazanda 447,14 teńgege deıin arzandady. 16 qazanda qaıtadan 454,14 teńgege kóterilip, aıdyń sońǵy aptasynda taǵy ósti. Eń joǵary kórsetkish 29 qazanda tirkeldi: 457,09 teńge. 30 qazanda dollar 453,71 teńgege túskenimen, aı basyndaǵy deńgeıden 12,85 teńgege nemese shamamen 2,9 paıyz joǵary qaldy. Demek, teńge apta sońynda azdap nyǵaıǵanymen, qazan aıyn álsireýmen aıaqtap otyr.
Qolma-qol aıyrbas
Sondaı-aq, qyrkúıek aıynda qolma-qol valıýta naryǵynda eýroǵa suranys artqan. THE TENGE resýrsy Ulttyq bank derekterine súıenip júrgizgen taldaýynda halyqtyń aıyrbastaý pýnktterinen eýrony satyp alý kólemi tamyzben salystyrǵanda 15 mln dollarǵa ósip, 19,7 mln dollardyń balamasyna jetkenin jazady. Bul tórt negizgi valıýtanyń ishinde suranysy artqan jalǵyz valıýta boldy. Ósimniń jartysynan astamy Almaty, Shymkent jáne Astanaǵa tıesili: osy úsh qaladaǵy taza satyp alý jıyntyǵy 7,8 mln dollarǵa ulǵaıǵan. THE TENGE muny oqý jylynyń bastalýymen, shetelde bilim alýǵa baılanysty tólemdermen jáne Eýropaǵa saparlardyń kóbeıýimen baılanystyrady. Tamyzda keıinge qalǵan suranystyń bir bóligi de qyrkúıekte júzege asýy da múmkin.
