Valıýta baǵamy jáne ınflıatsııa: Kcell tarıfterdiń kóterilý sebepterin atady

ALMATY. KAZINFORM — Kcell aldaǵy ýaqytqa josparlanǵan tarıf baǵasyn ósirý týraly sheshimin qaıta qarady.

Buǵan deıin kompanııa keıbir tarıftik josparlar úshin aı saıynǵy abonenttik tólemdi 21 sáýirden bastap túzetiletini týraly málimdegen edi. Alaıda keıin bul sheshimnen bas tartty.

Onyń sebebin «Kcell » AQ bas kommertsııalyq dırektory jáne basqarma múshesi Qazbek Shaıymov túsindirdi.

— Tarıfterdi kóterý máselesi bizdiń abonentterimizdi únemi alańdatady. Biz baǵany retteýdi josparladyq. Biraq ártúrli faktorlardy, birinshi kezekte klıentterimizdiń ótinishterin eskere otyryp, biz on tarıftik jospar boıynsha aǵymdaǵy sharttardy saqtaýdy uıǵardyq jáne eshqandaı ózgeris engizgen joqpyz, — dep atap ótti ol.

Aıtýynsha, tarıftik jospardy qalyptastyrý kóptegen faktorǵa baılanysty.

— Birinshiden, bul qazirgi jaǵdaıda kútpegen áreket etetin valıýta baǵamy. Biz Ericsson sııaqty telekommýnıkatsııa salasyndaǵy jetekshi kompanııalarmen yntymaqtasamyz jáne kóptegen kelisimshartymyz shetel valıýtasynda jasalǵan. Sondyqtan dollar baǵamynyń kez kelgen ózgerisi áser etedi. Biz basqa da ekonomıkalyq kórsetkishterdi, sonyń ishinde ınflıatsııany qarastyramyz. Sondyqtan keıde jeli sapasyn saqtaý úshin osyndaı sheshimder qabyldaýǵa týra keledi. Derekter trafıgin tutyný kólemi únemi ósip keledi: kóptegen abonent bizdiń qyzmetti jumys jáne oqý úshin paıdalanady. Sondyqtan turaqty jáne sapaly kommýnıkatsııany qamtamasyz etý, ınfraqurylymdy damytý jáne bıznesti qoldaý mańyzdy. Bolashaqta tarıfter ózgeredi me degen suraqqa bizde naqty jaýap joq — bul kóptegen faktorǵa baılanysty, — dedi Qazbek Shaıymov.

Osyǵan deıin elimizde baılanys sapasyn qadaǵalap, azamattardyń quqyqtaryn qorǵaıtyn qor qurylatyny týraly jazǵan edik. 

Aıta keteıik, QR Tsıfrlyq damý, ınnovatsııalar jáne aeroǵarysh ónerkásibi mınıstrligi bıyl Qytaıdyń Shanghai Spacecom Satellite spýtnıktik kompanııasymen memorandýmǵa qol qoıýdy josparlap otyr.