Ulttyq bank: AQSh dollary 550 teńgege deıin jetti

ASTANA. KAZINFORM — 30 shildedegi saýda-sattyq barysynda teńge baǵamy AQSh dollary úshin 550 teńgege deıin jetip, aı basynan beri 5,8%-ǵa, al jyl basynan beri 4,7%-ǵa álsiredi, dep habarlaıdy QR Ulttyq bankiniń baspasóz qyzmeti.

Bank baspasóz qyzmetiniń málimetinshe, valıýta naryǵyndaǵy ótimdiliktiń óte tómen bolýyna jáne alypsatarlyq qysymnyń kúsheıý belgilerine baılanysty Qazaqstan Respýblıkasynyń Ulttyq Banki valıýtalyq ınterventsııalar júrgizýge kiristi.

Negizgi ekonomıkalyq jaǵdaılar qolaıly bolyp qalýda: munaıdyń álemdik baǵasy bir barrel úshin 70 AQSh dollarynan turaqty túrde asyp tur, AQSh dollarynyń jahandyq álsireý úrdisi saqtalýda. Osyǵan baılanysty teńgeniń qazirgi álsireýi irgeli faktorlardy kórsetpeıdi jáne ulttyq valıýtanyń jetkiliksiz baǵalanǵanyn bildiredi.

— Ulttyq Bank bırjalyq jáne bırjadan tys valıýta naryqtaryndaǵy jaǵdaıdy muqııat qadaǵalap otyrady jáne qajet bolǵan jaǵdaıda aıyrbastaý baǵamynyń turaqsyzdandyrýshy aýytqýlaryna jol bermeý, shetel valıýtasyna suranys pen usynys teńgerimin qalpyna keltirý, sondaı-aq valıýta naryǵynyń qalypty jumys isteýin qamtamasyz etý úshin shuǵyl sharalar qabyldaýǵa daıyn. Ulttyq Bank transparenttilik qaǵıdaty aıasynda valıýta naryǵyndaǵy barlyq operatsııalar týraly tolyq aqparatty jarııalap otyrady, — delingen habarlamada.

Buǵan deıin teńge baǵamynyń qazirgi jaǵdaıyna baılanysty Ulttyq bank tóraǵasynyń orynbasary Álııa Moldabekova túsinikteme berdi.