«Valıýt-Tranzıt bank» AQ-ny taratý komıssııasy 260 mln. teńgeni jymqyrǵan - QR Bas prokýratýrasy
ASTANA. Qyrkúıektiń 2-si. QazAqparat /Arman Asqarov/ - Bas prokýratýra «Valıýt-Tranzıt bank» AQ-nyń 260 mln. teńgesin jymqyrǵan komıssııanyń zańsyz isine qatysty materıaldardy qarjy organdaryna jiberdi. Bul týraly búgin ótken baspasóz máslıhatynda QR Bas prokýratýrasnyń resmı ókili Nurdáýlet Súıindikov málim etti,
dep habarlaıdy QazAqparat.
Onyń sózine qaraǵanda, Qaraǵandy oblysynyń prokýratýrasy júrgizgen tekserý jumystarynyń nátıjesinde «Valıýt-Tranzıt bank» AQ-syn taratýmen aınalysqan komıssııanyń azamattarǵa tıesili 47 mlrd. teńgeniń tek 3,7 mlrd. teńgesin ǵana qaıtarǵandyǵy anyqtaldy. «Sondaı-aq tekserý barysynda basqa da kóptegen zań buzýshylyqtar anyqtaldy. Onyń ishinde jalpy somasy 260 mln. teńgeni quraıtyn banktiń múlkin esepten zańsyz shyǵarý jaǵdaıy bar», - dedi N.Súıindikov.
