Valley kompanııasy Qazaqstanda sýarý mashınalaryn óndirýdi josparlap otyr

Bul týraly Aýyl sharýashylyǵy mınıstri Aıdarbek Saparovtyń kompanııanyń Eýrazııa jáne Latyn Amerıkasy boıynsha óńirlik vıtse-prezıdenti Fılıpp Shmıdt-Holtsmanmen kezdesýi barysynda aıtyldy.

Mınıstr sýarmaly eginshilikti damytý memlekettik agrarlyq saıasattyń basym baǵyttarynyń biri ekenin atap ótti.

-Prezıdent jyl saıyn 150 myń gektarǵa deıin sý únemdeý tehnologııalaryn engizý mindetin qoıdy. Bul shara aýyl sharýashylyǵyn jańǵyrtýǵa, sý resýrstaryn tıimdi paıdalanýǵa jáne sýarmaly jerlerdiń kólemin ulǵaıtýǵa baǵyttalǵan. Biz sýarmaly alqaptardy keńeıtýge, sonyń ishinde sheteldik ınvestıtsııalardy tartýǵa baǵyttalǵan jobalarǵa múddelimiz. Sizder usynyp otyrǵan joba agroónerkásiptik sektordy damytý úshin erekshe mańyzdy. Mundaı bastamalardy iske asyrý salanyń klımattyq táýekelderge tózimdiligin arttyryp, ónimdilikti kóbeıtýge yqpal etedi, — dedi Aıdarbek Saparov.

Óz kezeginde Fılıpp Shmıdt-Holtsman Ortalyq Azııa naryǵy zamanaýı sýarý sheshimderin engizý úshin zor áleýetke ıe ekenin atap ótti.

Onyń pikirinshe, jergilikti ónerkásiptik seriktestermen áriptestik ornatý jobany tıimdi iske asyrýǵa múmkindik beredi.

Kezdesýge qatysýshylar ınvestıtsııalyq jobany júzege asyrýǵa qatysty máselelerdi de nazardan tys qaldyrmady. Qazaqstandyq seriktes «Imstalkon» aktsıonerlik qoǵamy.

Óndiristi ornalastyrý alańdary retinde kompanııanyń óndiristik qýattary ornalasqan Qaraǵandy, Shyǵys Qazaqstan, Pavlodar, Almaty jáne Túrkistan oblystary qarastyrylyp otyr.

Jobanyń qýaty: jylyna 300–500 jańbyrlatyp sýarý mashınasy. Jalpy ınvestıtsııa kólemi 17 mln dollardy quraıdy.

Jergilikti óndiristiń iske qosylýy eldiń agroónerkásiptik keshenin damytýdaǵy mańyzdy qadam bolmaq.

Bul fermerler úshin zamanaýı tehnologııalardyń qoljetimdiligin arttyryp, sý resýrstaryn utymdy paıdalaný.

Osyǵan deıin elde óndiris, aýyl sharýashylyǵy jáne jol qurylysy qarqyn alǵany týraly jazdyq.