Valerıı Meladze Astanany álemdegi eń taza qalalardyń biri dep atady
ASTANA. KAZINFORM – Reseılik tanymal ánshi ári mýzykalyq prodıýser Valerıı Meladze elordada ótken kontsertinde Astana týraly áserimen bólisip, qalanyń tazalyǵy men sáýletine joǵary baǵa berdi.
Ánshi aldymen ózin jyly qarsy alǵan qazaqstandyq kórermenderge alǵys aıtyp, Astanada qaıta óner kórsetkenine qýanyshty ekenin jetkizdi.
– Osyndaı zor yqylaspen, qushaq jaıa qarsy alǵandaryńyzǵa sheksiz alǵysymdy bildirgim keledi. Raqmet sizderge, qymbattylarym! Shyn júrekten alǵys aıtamyn, – dedi Valerıı Meladze.
Óner ıesi elordanyń jyl saıyn ózgerip, jańaryp kele jatqanyn atap ótti. Onyń aıtýynsha, Astana qarqyndy damyǵanyna qaramastan, óziniń erekshe atmosferasy men kórkin saqtap otyr.
– Ádemi, taza, kórikti, janǵa jaıly ári zamanaýı qala. Meniń oıymsha, álemdegi eń taza qala, – dedi ánshi.
Valerıı Meladze buǵan deıingi Astanaǵa saparlaryn da eske alyp, sodan bergi ýaqytta elordanyń aıtarlyqtaı ózgergenine nazar aýdardy.
Sóz sońynda ánshi Astananyń odan ári órkendeı berýine tilektestik bildirdi. Sondaı-aq sońǵy jarty jylda alǵash ret sahnada osynshalyqty uzaq kirispe sóz sóılegenin ázilmen jetkizdi.
Aıta keteıik, buǵan deıin elordanyń tazalyǵy men ony qamtamasyz etetin kommýnaldyq qyzmetkerlerdiń eńbegi týraly arnaıy materıal jarııalanǵan bolatyn. Onda Astananyń sanıtarlyq tazalyǵyn saqtaý jáne qalany abattandyrý jumystary baıandalǵan.
