Valentino sán úıiniń negizin qalaǵan Valentıno Garavanı ómirden ótti
ASTANA. KAZINFORM — Bul týraly Valentıno Garavanı men Djankarlo Djammettı qory áleýmettik jelilerde jarııalaǵan habarlamada málimdedi. Onda «Ol búgin Rımdegi rezıdentsııasynda jaqyndarynyń ortasynda dúnıeden ótti» dep jazylǵan, dep habarlaıdy agenzianova.com.
Italııadaǵy eń tanymal dızaıner ári halyqaralyq sán álemindegi eń yqpaldy tulǵalardyń biri Valentıno Garavanı 1932 jyly Pavııa provıntsııasyndaǵy Vogera qalasynda dúnıege kelgen.
Jas kezinen óner men ásemdikke degen erekshe qushtarlyq tanytqan ol aldymen Mılanda, keıin Parıjde – Beıneleý óneri mektebinde jáne Joǵary sán sındıkatynda bilim aldy. Jan Desse men Gı Laroshty qosa alǵanda, Frantsııanyń bedeldi sán úılerinde eńbek etkennen keıin, 1960 jyly Italııaǵa oralyp, seriktesimen birge Rımde Valentino sán úıin qurdy.
Mansaby barysynda ol kóptegen marapatqa ıe boldy.
Atap aıtqanda, Venetsııa kınofestıvalinde kınematografııaǵa qosqan úlesi úshin «Altyn arystan» syılyǵyn, sondaı-aq Frantsııanyń Qurmet legıony ordenin aldy. Bul marapattar onyń mádenı jáne stıldik yqpalynyń aıǵaǵy boldy.
2008 jyly Valentıno Garavanı Parıjde este qalarlyq sán kórsetilimin ótkizip, sán áleminen resmı túrde ketkenin jarııalady.
Ol sán úıindegi shyǵarmashylyq basshylyqtan bas tartqanymen, sán ıkonasy retindegi mártebesin saqtap qaldy.
Habarlanǵandaı, qoshtasý rásimi Rımde sársenbi jáne beısenbi kúnderi ótedi. Al jerleý juma kúni uıymdastyrylady.