Valensııa - Ispanııanyń kórkem beınesi - FOTOREPORTAJ
ASTANA. QazAqparat - Tarıhy ekimyńjyldyqtan asatyn Valensııa qalasynyń kórkemdigine tamsanǵan jurt ony Ispanııanyń sulý áıeliniń beınesine teńep jatady. Qalanyń árbir joly men kóne de kórkem ortaǵasyrlyq tas qabyrǵalary teńiz jaǵasyna qaraı tartyp turatyndaı.
Bizdiń mundaı ǵajaıyp qalany betke alǵandaǵy maqsatymyz - eń aldymen qoınaýy ańyz áńgimeler men oqıǵalarǵa toly tarıhı qazynaǵa qanyǵyp, tańdanarlyq sáýletke baı qurylys nysandarymen etene tanysý bolatyn.
Alǵashqy kúngi saıahat-serýenimiz Jerorta teńizinen bastaý aldy. Qazaqstandyq týrıster úshin týrıstik maýsym katamaranmen eki saǵattyq saparlaý men ashyq teńizde shomylýmen ashyldy. Keıinirek, teńiz jaǵasyndaǵy taza aýada qurǵan saıahatymyz qala ishindegi hanzada Felıpe atyndaǵy Ǵylym jáne óner murajaıy men Korol Sofııa opera teatrynda jalǵasyn tapty. Bul murajaı - tanymal sáýletshiler Santıago Kalatrava men Felıks Kandela salǵan Eýropadaǵy eń iri mádenı, oıyn-saýyq kesheni bolyp tabylady. Munda ǵylym men tabıǵattyń ózara úndesken tańǵajaıyptary óte kóp. Sonyń biri - sandyq úlgidegi kınony kórermenderge shalqalaı jatyp, shańyraqtan kórý múmkindigin syılaýy bolsa kerek-ti.
Saıahatymyzdyń ekinshi kúninde bizdiń jolymyz Markız Dos Agýas saraıy men tarıhy sonaý XV ǵasyrlarǵa baryp tireletin Merkat Mýnıtsıpal ortalyq jabyq bazary men Jibek bırjasyna tústi. Aıta keteıik, bul nysandar BUU-nyń Búkilálemdik mádenı muralar eskertkishiniń qataryna engen jáne Eýropanyń kónegotıkalyq azamattyq sáýletiniń jaýhary bolyp tabylady. Sonymen qatar, biz kóp keshikpeı Valensııa shaharynyń bas qazynasy sanalatyn, qalanyń qaq ortasyna ornalasqan qasıetti Deva kafedraldy soboryna keldik. Qasıetti Deva Marııa baǵanaly shirkeýi La-Almoına murajaıynyń eń qundy qazynalarynyń biri. Bul óz zamanynda ǵıbadatshy Vıkentıı men onyń sáýletti saraıy bolǵan desedi.
Bizdiń saıahatymyzdyń kelesi aıaldamasy Toledo qalasy bolmaq.
