Valdaı klýbynyń qatysýshylary Qazaqstannyń syrtqysaıası qadamdaryna qyzyǵyp otyr – Erlan Qarın
SOChI. QazAqparat – «Valdaı» pikirtalas klýbynyń qatysýshylary halyqaralyq jáne aımaqtyq qaýipsizdikti, turaqtylyqty jolǵa qoıýda qazaqstandyq amal-ádisterge qyzyǵyp otyr. Bul týraly QR Prezıdentiniń keńesshisi Erlan Qarın Sochıdegi jyl saıynǵy «Valdaı» halyqaralyq pikirtalas klýbynyń XVI otyrysynda aıtyp berdi, dep habarlaıdy «QazAqparat» HAA menshikti tilshisi.
Erlan Qarın atap ótkendeı, «Valdaı» pikirtalas klýby halyqaralyq jáne aımaqtyq kún tártibindegi eń ózekti máseleler boıynsha pikir almasýdyń bedeldi alańdarynyń biri bolyp sanalady. Valdaı klýbynyń is-sharalaryna jyldaǵy dástúr boıynsha ártúrli elderdiń memlekettik organdary men sarapshylar qaýymdastyǵynyń ókilderi qatysady. Sonymen qatar, memleket pen úkimet basshylarynyń kópjaqty jáne ekijaqty formattaǵy kezdesýleri forým sheńberindegi mańyzdy oqıǵalardyń biri bolary anyq.
«Mundaı kezdesýler bizdiń elimiz úshin óte paıdaly. Qazaqstan halyqaralyq protsesterdiń belsendi qatysýshysy bola otyryp, álemdik qaýymdastyqqa qazirgi zamanǵy syn-qaterlerdi sheshýge degen kózqarasyn jetkizýge tyrysady. Bul alań bizdiń elimizdiń syrtqy saıası baılanystaryn keńeıtýge múmkindik beredi. Sol sebepti, mundaı kezdesýler óte mańyzdy ári paıdaly», - dedi Memleket basshysynyń keńesshisi.
Erlan Qarınniń aıtýynsha, «Valdaı» klýbynyń qatysýshylaryn Qazaqstannyń syrtqy saıası amal-ádisteri qyzyqtyryp otyr.
«Sonyń ishinde ıadrolyq qarýsyzdaný máseleleri, Astana protsesi (Sırııadaǵy), Taıaý Shyǵystaǵy, Ońtústik Azııadaǵy jaǵdaılar... Bul pikirtalastar eshqashan Qazaqstannyń qosqan úlesin talqylamaı ótpeıdi», - dedi ol.
«Shyǵys tańy jáne dúnıejúzilik saıası qurylym» forýmynyń jarııalanǵan taqyryptary týraly aıta kele Memleket basshysynyń keńesshisi Reseıdiń Shyǵysqa nazary baryn atap ótti. Onyń aıtýynsha, osy rette Reseı Federatsııasy strategııalyq seriktesi jáne jaqyn kórshisi bolyp tabylatynyn Qazaqstannyń rólin jiti túsinip otyr.
«Azııamen yntymaqtastyqtyń túrli nusqalary, meıli, eki jaqty nemese kópjaqty formatta bolsyn – Qazaqstannyń qatysýy arqyly júzege asyrylady. Halyqaralyq sarapshylar Qazaqstannyń Eýrazııa qurlyǵyndaǵy ekonomıkalyq yntymaqtastyqty damytýdaǵy, turaqtylyq pen qaýipsizdikti qamtamasyz etýdegi rólin erekshe atap ótedi. Sondyqtan, kóptegen sarapshylar Qazaqstannyń bastamalaryn odan ári damytýǵa nıet bildirip otyr», - dep túıindedi Prezıdent keńesshisi.
Aıta keteıik, Qazaqstan Prezıdenti Qasym-Jomart Toqaev jumys saparymen Sochıge keldi. Memleket basshysynyń «Valdaı» halyqaralyq pikirtalas klýbynyń XVI otyrysyna qatysýy josparlanǵan.
