Vaktsınadan bas tartý umyt bolǵan qaýipti aýrýlardyń órshýine ákelýi múmkin – Ajar Ǵınııat
Jeltoqsanda qyzylshaǵa qarsy 1 mln doza vaktsına jetkiziledi. Bul týraly Densaýlyq saqtaý mınıstri Ajar Ǵınııat málim etti, dep habarlaıdy Kazinform.
«Qyzylsha boıynsha jaǵdaıdy turaqtandyrý maqsatynda sharalar qabyldandy. Birinshiden, qyzylshaǵa qarsy josparly vaktsınatsııalaýmen 600 myńnan astam bala qamtyldy. Bul 1 jas jáne 6 jas aralyǵyndaǵy balalardyń 84 paıyzyn quraıdy. Jyl sońyna deıin osy jas tobyndaǵy 100 myńnan astam bala vaktsınatsııalaýǵa jatady», - dedi mınıstr Ortalyq kommýnıkatsııalar qyzmetindegi brıfıngte.
Onyń atap ótýinshe, ekinshiden, qyzylshamen aýyrǵandarmen baılanysta bolǵan 15 myńnan astam adam shuǵyl vaktsınatsııalaýmen qamtyldy. Úshinshiden, buryn vaktsına almaǵan 18 jasqa deıingi 63 myńnan astam adam vaktsına aldy. Tórtinshiden, 5 jasqa deıingi balalardy ımmýndaý júrgizilip jatyr. Osy ýaqytqa deıin 100 myńnan astam bala vaktsınatsııalandy.
«Qosymsha jappaı ımmýndaý júrgizý úshin qyzylshaǵa qarsy vaktsınanyń 1,5 mln dozasy satyp alyndy. Onyń 500 myń dozasy kelip tústi, jeltoqsan aıynda 1 mln doza jetkiziledi dep kútilýde. Osyǵan baılanysty, halyqtyń belsendiligi men vaktsınatsııalaýdy tańdaý bizdiń balalarymyzdyń densaýlyǵyn saqtaýdy qamtamasyz etýge múmkindik beredi», - dedi ol.
Mınıstrdiń aıtýynsha, jappaı ımmýndaýmen joǵary qamtý ǵana jeltoqsan aıynda qyzylsha boıynsha epıdemıologııalyq jaǵdaıdy turaqtandyrýǵa jáne 2024 jylǵy qańtarda syrqattanýshylyqty azaıtýǵa múmkindik beredi.
«Vaktsınamen basqarylatyn aýrýlar men asqynýlardan balalardyń densaýlyǵyn qorǵaý týraly sheshim qabyldaıtyn ata-analardan vaktsınatsııalaýdan bas tartý kókjótel, dıfterııa, polıomıelıt, sirespe sııaqty umytylyp ketken qaýipti aýrýlardyń órshýine ákelýi múmkin ekenine, bul kóbine joǵary múgedektik pen ólimge ákeletinine asa nazar aýdarýyn ótinemin. Eger sizderdiń 5 jasqa deıingi balalaryńyz bolsa, Ulttyq egý kúntizbesine sáıkes balalaryńyzda ekpelerdiń bar-joǵyn tekserýdi suraımyn jáne mindetti túrde qosymsha jappaı ımmýndaý aıasynda ekpe alýdy umytpańyz. Vaktsınatsııalanbaǵan jaǵdaıda balalaryńyzdy tirkelgen jeri boıynsha medıtsınalyq uıymda dereý vaktsına alýdy usynamyn. Balalaryńyzdyń densaýlyǵy óz qoldaryńyzda», - dedi Ajar Ǵınııat.
