Vaktsınatsııa týraly derekterdiń áli de qaǵazǵa jazylyp jatqany túsiniksiz - senator

Búgin Senattyń jalpy otyrysynda depýtat Bıbigúl Jeksenbaı qyzylshaǵa qarsy ekpe salý máselesin kóterdi, dep habarlaıdy Kazinform.

«AQSh-tyń aýrýlardy baqylaý jáne aldyn alý ortalyǵy qyzylshanyń jahandyq indetine qatysty málimetti jarııalap, Qazaqstan aýrý juqtyrǵandar sany boıynsha alǵashqy úshtikke endi. Qazir elimizde qyzylsha juqtyrǵandar sany 21 myńnan asty. Sarapshylar pikirinshe,

Qazaqstanda vaktsınatsııa problemasy bir sátte paıda bolmaǵan. Juqpaly derttiń basty sebebiniń biri – ekpe baǵytyndaǵy jumystyń áli júıeli, josparly, nátıjesi saralanyp, jasalmaı kele jatqandyǵy», - dedi B. Jeksenbaı Premer-Mınıstr Álıhan Smaıylovtyń atyna joldaǵan saýalynda.

Sonymen qatar ol birqatar óńirde elde bar vaktsınalardyń ózi keńinen taralmaǵanyn jáne egý qyzmetiniń sapasy tómek ekenin aıtty.

«Aýyldarda medıtsınalyq personal men qural-jabdyqtardyń jetispeýi de balalardy ýaqtyly vaktsınatsııalaýdy qıyndatyp otyr. Odan bólek, dinı nanymdarǵa baılanysty ekpeden bas tartqandarmen jumys pármendi júrgizilmeıdi. Ekpe jasalýy týraly málimet pen kórsetkishter boıynsha esepterdiń durystyǵyna kúmán bar. Qazaqstan tsıfrlandyrý boıynsha alǵa shyqty dep maqtanǵanymyzben, vaktsınatsııa týraly málimetter áli qaǵazda jazylýy bolýy túsiniksiz», - dedi senator.

Depýtat Úkimettiń bul máseleni sheshýge jyldar boıy nemquraıly qaraǵanyna narazylyǵyn jetkizdi jáne jaǵdaıdy sheshýge baǵyttalǵan birqatar usynystar aıtty.

«Eń aldymen, jaǵdaıdy jaqsartý úshin qoǵamda vaktsınatsııanyń mańyzdylyǵy men qaýipsizdigi týraly aqparattyq jumysty kúsheıtý qajet. Ekinshiden, elimizdiń barlyq aımaqtarynda joǵary sapaly vaktsınalar men densaýlyq saqtaý qyzmetterin kedergisiz alýdy qamtamasyz etip, arnaıy mobıldi medıtsınalyq toptardy uıymdastyrý kerek. Úshinshiden, vaktsına sapasy men onyń merzimi ótkenderin joıýdy qadaǵalaýdy barynsha kúsheıtý mańyzdy», - dedi Bıbigúl Jeksenbaı.