Vaktsınalaý jáne ımmýndaý: 34 jylda qandaı kórsetkishke qol jetti

ASTANA. KAZINFORM — QR DSM Sanıtarııalyq-epıdemıologııalyq baqylaý komıtetiniń vaktsınamen basqarylatyn ınfektsııalardy baqylaý basqarmasynyń basshysy Nurshaı Ázimbaeva elimizde vaktsınalaý arqyly qandaı kórsetkishke qol jetkenin aıtty.

— Qazirgi ýaqytta ımmýndaý baǵdarlamasy 21 ınfektsııaǵa qarsy vaktsınatsııany qamtıdy. Olar: qutyrma, ish súzegi, kene entsefalıti, A, V gepatıti, V tıpti gemofıldi ınfektsııa, dıfterııa, kókjótel, qyzylsha, qyzamyq, polıomıelıt, sirespe, týberkýlez, oba, parotıt, pnevmokokk ınfektsııasy, APV, KVI, tumaý, sibir jarasy, týlıaremııa. Jyl saıyn respýblıka boıynsha 4 mln-nan astam adam egiledi. Vaktsınalardy satyp alýǵa shamamen 38 mlrd teńge bólinedi, — dedi ol.

Onyń aıtýynsha, ımmýndaý arqyly ınfektsııalar men olardan bolatyn ólimdi azaıtý úshin kóp nárse jasalǵan. Mysaly, 1996 jyldan bastap polıomıelıt, 2009 jyldan bastap dıfterııa jaǵdaılary tirkelmegen.

Sondaı-aq, spıker sońǵy 34 jylda Ulttyq ımmýndaý saıasatynyń arqasynda mynadaı nátıjege qol jetkenin atap ótti:

— epıdparotıt — 100 eseden astam (ıaǵnı 1990 j. 12194 jaǵdaıdan 2024 j. 118 jaǵdaıǵa deıin);
— A vırýstyq gepatıti — 32 eseden astam (ıaǵnı 1990 j. 73 962 j. 2024 jyly 2289 j. deıin);
— V vırýstyq gepatıti — 92 ese (1990 j. 5287-den 2024 j. 57 jaǵdaıǵa deıin);
— qyzamyq — 2 myń eseden astam (24 396 jaǵdaıdan 2024 j. 11 jaǵdaıǵa deıin) tómendegen.

Odan bólek, sirespemen syrqattaný deńgeıi turaqty. Aýrýdyń tek birli-jarym jaǵdaılary tirkeledi: 1990 jyly — 13 jaǵdaı, byltyrǵy jyly — 2 jaǵdaı.

Aıta keteıik, buǵan deıin elimizde balasyna vaktsına saldyrmaıtyn ata-ana kóbeıip kele jatqanyn jazǵan edik.