Vaktsınalardy tsıfrlyq baqylaý jylyna 450 mln teńgege deıin únemdeýge múmkindik beredi
ASTANA. KAZINFORM – Qazaqstanda vaktsınalardy saqtaý jáne tasymaldaý jaǵdaılaryn naqty ýaqyt rejıminde baqylaıtyn tsıfrlyq júıe barlyq óńirge engiziledi, dep habarlaıdy QR Densaýlyq saqtaý mınıstrligi.
Jańa júıe vaktsınalardy qoımada saqtaýdan bastap, tasymaldaý jáne medıtsınalyq uıymdarǵa jetkizýge deıingi «sýyq tizbektiń» barlyq kezeńin qamtıdy. Bul vaktsınalardyń sapasy men qaýipsizdigin qamtamasyz etýge qosymsha múmkindik beredi.
Densaýlyq saqtaý mınıstri Aqmaral Álnazarova Premer-mınıstrdiń qatysýymen ótken tsıfrlandyrý jónindegi keńeste pılottyq joba alǵash ret ótken jyly Qaraǵandy oblysynda synaqtan ótkizilgenin aıtty.
– «Vaktsınalardyń «sýyq tizbeginiń» saqtalýyn baqylaý jáne qadaǵalaýdyń pılottyq jobasy alǵash ret ótken jyly Qaraǵandy oblysynda synaqtan ótkizildi. Qazaqtelekommen birlesip, atalǵan jobany 2026 jyldyń sońyna deıin barlyq óńirde masshtabtaý josparlanyp otyr. Jyl saıyn vaktsınalardyń jalpy kóleminiń shamamen 1,5%-y búlinýine jáne «sýyq tizbekke» baqylaýdyń bolmaýyna baılanysty esepten shyǵarylady. Bul jylyna shamamen 400-450 mln teńgeni quraıdy, – dedi mınıstr.
Biryńǵaı tsıfrlyq júıege elimiz boıynsha 3,5 myńnan astam nysan men 21 myńnan astam temperatýralyq baqylaý núktesin biriktirý josparlanǵan.
Vaktsınalardy tasymaldaý kezinde de jeke baqylaý júrgiziledi. Temperatýra kórsetkishteri jol boıy baqylanyp, arnaıy kóliktiń qozǵalysy GPS arqyly qadaǵalanady.
Sonymen birge medıtsınalyq uıymdardaǵy tońazytqysh jabdyqtardy jańartý jumystary jalǵasyp jatyr.
Mınıstrlik málimetinshe, jańa júıe «sýyq tizbekti» baqylaýdyń biryńǵaı tsıfrlyq kontýryn qalyptastyryp, vaktsınalardy saqtaý men tasymaldaý jaǵdaılaryn búkil el boıynsha qadaǵalaýǵa múmkindik beredi.
Aıta keteıik, buǵan deıin Qazaqstanda vaktsınalardy saqtaý temperatýrasy onlaın baqylanatyny habarlandy.
