Vaktsına tapshy: Óskemende kene shaqqan halyqqa ımmýnoglobýlın salynbaı jatyr

ÓSKEMEN. KAZINFORM – Óskemen qalasynda keneden zardap shekken turǵyndarǵa ımmýnoglobýlın egilmeı jatyr. Buǵan sebep - preparattyń tapshylyǵy.

Sońǵy bir aı ishinde medıtsınalyq mekemege júgingen azamattarǵa vaktsına salynbaı, tek kene shaqqan jerdi zalalsyzdandyrý júrgizilip, dene qyzýyn baqylap otyrý usynylyp keledi.

- Meni kene shaǵyp alǵannan keıin aýrýhanaǵa qaraldym. Biraq dárigerler vaktsına joq dep, baqylaýda bolatynymdy ǵana aıtty. Bir aı boıy vaktsına kelmegen eken. Bizdiń oblysta kene entsefalıti men basqa da qaýipti ınfektsııalar tirkelip jatyr ǵoı. Onda nege aýrýhanalarǵa vaktsına satyp alynbaıdy?! – dep narazylyǵyn bildirdi aty-jónin atamaýdy suraǵan Óskemen qalasynyń turǵyny.

Osy máselege baılanysty ShQO Densaýlyq saqtaý basqarmasynan jaýap berdi.

- 2025 jylǵa arnalǵan kene entsefalıtine qarsy ımmýnoglobýlın satyp alý jónindegi tapsyrys 2024 jyly jasalǵan. Sonyń negizinde 2025 jyldyń 7 naýryzynda óńirge 23 850 ml ımmýnoglobýlın jetkizildi. Alaıda kóktem erte shyqqandyqtan, kene sany kóbeıip, olardan zardap shekken halyq sany kúrt artty. Osyǵan baılanysty basqarma «SK-Farmatsııa» JShS-ǵa qosymsha ótinim joldady. Sondaı-aq basqa óńirlerge preparatty ózara qaıtarym negizinde bólisý týraly resmı suraýhattar jiberildi, – delingen habarlamada.

Eske salsaq, osyǵan deıin saqtandyrylmaǵan qazaqstandyqtar qandaı medıtsınalyq kómekti tegin ala alatyndyǵy jaıly jazǵanbyz.