Vaktsına aýtızm týdyrady degen aqparattyń túbi qaıda jatyr
ASTANA. KAZINFORM — Qyzylsha, qyzamyq jáne epıdemııalyq parotıtke qarsy QQP vaktsınasy men aýtızm arasynda baılanys bar degen pikir 1998 jyly jarııalanǵan daýly zertteýden keıin keń tarady, dep habarlaıdy Sanıtarııalyq-epıdemıologııalyq baqylaý departamentiniń baspasóz qyzmeti.
Atalǵan zertteýde QQP vaktsınasy, ishek aýrýlary jáne balalardaǵy aýtızm arasynda baılanys bolýy múmkin degen boljam aıtylǵan. Keıin zertteýdiń ádistemesinde eleýli buzýshylyqtar bolǵany jáne ondaǵy derekterdiń durystyǵyna qatysty máseleler anyqtaldy.
— Osyǵan baılanysty The Lancet ǵylymı jýrnaly 2010 jyly maqalany resmı túrde keri qaıtardy. Zertteý jarııalanymnan alynǵannan keıin QQP vaktsınasy men aýtızm arasyndaǵy yqtımal baılanysty anyqtaý úshin kóptegen aýqymdy zertteýler júrgizildi. Olardyń qatarynda mıllıondaǵan balany qamtyǵan ulttyq zertteýler men metataldaýlar bar. Júrgizilgen zertteýler QQP vaktsınasy aýtızmdi týdyratynyn rastamady, — delingen habarlamada.
Vedomstvonyń málimetine sáıkes, soǵan qaramastan, 1998 jylǵy maqalanyń bastapqy tujyrymdary áleýmettik jelilerde jáne basqa aqparattyq resýrstarda áli de taralyp keledi. Bul vaktsınatsııaǵa qatysty negizsiz alańdaýshylyqtyń saqtalýyna yqpal etedi.
Osylaısha, QQP vaktsınasy men aýtızm arasynda baılanys bar degen pikirge negiz bolǵan zertteý ǵylymı jýrnal tarapynan resmı túrde keri qaıtarylǵan. Keıingi aýqymdy ǵylymı zertteýler QQP vaktsınasy men aýtızm arasynda baılanys bar ekenin rastaǵan joq.
Jýyrda Kazinform-da jarııalanǵan materıalda Jandos Quljanbekov jańa týǵan nárestege egiletin «K» dárýmeni bılırýbınniń joǵarylaýyna jáne keıin balanyń damýyndaǵy buzylystarǵa áser etýi múmkin degen pikir aıtqan edi. Osyǵan baılanysty Kazinform Densaýlyq saqtaý mınıstrligine saýal joldap, sala mamandarynan K dárýmeni jańa týǵan nárestege ne úshin egiletinin, onyń balaǵa qandaı áseri baryn, náresteniń keıingi damýyna qanshalyqty yqpal etetinin surap, saýal joldady.
