Vaktsına arqyly jatyr moıny obyrynyń jıiligin tómendetýge bolady — DDU Qazaqstandaǵy ókili
ASTANA. KAZINFORM – Búgin Astanada Densaýlyq saqtaý mınıstrliginiń qoldaýymen DDU-nyń adam papıllomasy vırýsyna (APV) qarsy vaktsınatsııalaý máseleleri jónindegi aptalyq respýblıkalyq semınar-trenıngi ótip jatyr. Bul týraly Densaýlyq saqtaý mınıstrliginiń baspasóz qyzmeti málim etti.
Semınarǵa Ulttyq ımmýndaý baǵdarlamalarynyń basshylary qatysyp jatyr.
«Qarjylyq tıimdi jáne dáleldi medıtsınalyq-sanıtarııalyq is-sharalardy, sonyń ishinde qyzdardy adam papıllomasy vırýsyna qarsy vaktsınatsııalaýdy, sondaı-aq obyraldy zaqymdanýlardyń skrınıngi men emdeýdi júrgizý jáne obyrdyń ınvazıvti túrlerin dıagnostıkalaý men emdeýge qoljetimdilikti keńeıtý arqyly biz jatyr moıny obyryn qoǵamdyq densaýlyq problemasy retinde joıa alamyz. Bul aýrýdy ótken kezeńge qaldyra alamyz. Jatyr moıny obyrynan birde-bir áıel ólmeýi kerek. Bizdiń kúsh-jigerimizdi biriktireıik. Jatyr moıny obyryn joıýǵa barlyq elderdiń kúshi jetedi», — dep atap ótti DDU-nyń QR-daǵy eldik ofısiniń basshysy Skender Syla.
