Vaktsınanyń janama áserine shaldyǵý naızaǵaı túsý yqtımaldyǵymen birdeı – Almaz Sharman

NUR-SULTAN. QazAqparat – Profılaktıkalyq medıtsına akademııasynyń prezıdenti, Amerıka densaýlyq saqtaý qaýymdastyǵynyń múshesi Almaz Sharman vaktsınatsııadan keıingi janama áserlerden qorqý naızaǵaıdan qorqyp, jaýyndy kúni kóshege shyqpaýmen birdeı áreket degen oı aıtty, dep habarlaıdy QazAqparat tilshisi.

«Koronavırýs búginde aldyn alýǵa bolatyn aýrý. Vaktsına 100 paıyz bolmasa da, koronavırýs ınfektsııasynan, syrqattyń aýyr ótýinen qorǵaıdy. Búginde álemde túrli vaktsınalardyń 4 mlrd dozasy egildi. Árıne, vaktsınanyń ózi vırýs týdyrmaıdy jáne vaktsına alǵandar is júzinde kovıdten ólmeıdi. Vaktsınany 100 paıyz qaýipsiz dep te aıta almaımyz. Óte sırek jaǵdaılarda olar allergııalyq reaktsııa nemese qannyń uıýy sııaqty janama áserlerdi týdyrýy múmkin. Mundaı reaktsııalar vaktsına alǵan 50 myń adamnyń bireýinde ǵana kezdesedi. Bul yqtımaldylyqty naızaǵaı túsýi yqtımaldyǵymen salystyrýǵa bolady. Bul óte sırek kezdesedi», - dep túsindirdi sarapshy.

Sonymen qatar, ol vaktsına almaǵan ár besinshi adam qan uıý qaýpine shaldyǵatynyn aıtty.

«Bul qaýiptiń yqtımaldyǵy vaktsına alǵannan keıingi yqtımaldyqtan myń ese joǵary. Vaktsınalar jańa týǵan nárestelerde reprodýktıvtik aýytqýlar men deformatsııalardyń damýyna ákelmeıdi. Kerisinshe, kovıdpen aýyratyndar bedeýliktiń, shala týylýdyń, sondaı-aq mıdyń, júrektiń, basqa organdardyń sozylmaly syrqatynyń, onyń ishinde aqyl-oı qabiletiniń tómendeýiniń úlken qaýpine ushyraıdy», - dedi Almaz Sharman.