Vaktsınanyń esh keri áserin baıqamadym – aqtóbelik polıtseı
AQTÓBE. QazAqparat - Aqtóbe polıtsııasynyń jeke quramy «COVID-19» indetine qarsy vaktsına salynýda, dep habarlaıdy QazAqparat tilshisi.
Aqtóbede polıtseıler COVID-19-ǵa qarsy vaktsınany erikti túrde qabyldap jatyr. Olar qaladaǵy №4 qalalyq emhanaǵa baryp, tekserýden ótti. Alǵashqylardyń biri bolyp patrýldik polıtsııa batalonynyń komandıri Ermek Shoqanov ekpe aldy. Onyń densaýlyǵy birqalypty, kóńil-kúıi jaqsy.
Ermek Shoqanov osy arqyly aldymen týystaryn, áriptesteri jáne janyna jaqyn adamdardy qorǵaýǵa bel býǵan.
«Biz únemi el arasynda júremiz. Aldymen dáriger jan-jaqty tekserdi, qan qysymyn ólshedi. Vaktsınanyń esh keri áserin baıqamadym. Ózim áriptesterime úlgi bolyp, birinshi bolyp qabyldadym», - dedi Ermek Shoqanov.
Óz erkimen ekpe alýǵa daıyn polıtseılerdiń tizimi jasaldy. Birinshi kúni oblys ortalyǵynda 10 qyzmetker ekpe saldyrdy. Osy aıda 200 qyzmetker ımmýndalady. Polıtsııa basqarmasy bastyǵynyń orynbasary Nurlan Orazalın de jeke quramǵa úlgi bolyp, vaktsınany alǵashqylardyń biri bolyp aldy.
«Vaktsınatsııalaý koronavırýstyq ınfektsııanyń taralýyn jeńýge kómektesedi dep sanaımyn. Kúndelikti qyzmette kóp adammen baılanysta bolatyndyqtan, aınalamyzdyń qaýipsizdigi basty mindetimiz ekenin esten shyǵarmaımyz», - dep atap ótti N.Orazalın.
