Vaktsınanyń birinshi komponentin alǵandarǵa da «jasyl» statýs berilýi múmkin

NUR-SULTAN. QazAqparat – «Kók» statýs uǵymyn Ashyq júıesinen shyǵarý týraly aıtý ázirge erte. Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova ortalyq kommýnıkatsııalar qyzmetinde BAQ ókilderiniń suraǵyna bergen jaýabynda osyndaı pikir bildirdi, dep habarlaıdy QazAqparat tilshisi.

«Shynymen de qazir PTR test boıynsha naýqas ekeni anyqtalmaǵan jáne naýqaspen baılanysta bolmaǵan adamdar úshin «kók» statýs bar. Olar Ashyq júıesindegi nysandarǵa erkin kire alady. Qazir biz «jasyl» statýsqa ekpeniń tek eki komponentin ǵana alǵandardy emes, birinshi komponentin alǵandardy da qosqaly jatyrmyz. Bul óz kezeginde eldi vaktsına alýǵa yntalandyrady. Ekinshi jaǵynan, «kók» statýstaǵy adamdardyń sany azaıtýǵa múmkindik beredi», - degen komıtet basshysy «kók» satýsty Ashyq júıesinen shyǵarylýy múmkin ekenin aıtty.

«Ázirge bul asyǵys shara bolar edi. Óıtkeni vaktsınanyń bir komponentin alǵandardyń sany, ókinishke qaraı, 5 mln adamnan endi ǵana asty. Qalǵan 8 mln adam áli «kók» statýspen júr jáne «qyzyl», «sary» statýstaǵy azǵantaı halyq bar. Sondyqtan ázirge «kók» statýsty júıeden shyǵarý týraly aıtyp otyrǵan joqpyz. Vaktsına alǵandardyń sany kóbeıse, «kók» statýsty Ashyq júıesinen shyǵaryp tastaý múmkindigin qaraımyz dep topshylaımyn», - dedi Aıjan Esmaǵambetova.