Vaktsınanyń alǵashqy dozasyn alǵan áıel júkti ekenin bilse, qorqynyshty eshteńe joq - Roza Qojapova

NUR-SULTAN. QazAqparat – QR DSM sarapshylary vaktsınanyń birinshi dozasyn alǵan áıelder júkti ekenin bilgende ne isteýi kerek degen suraqqa jaýap berdi, dep habarlaıdy QazAqparat tilshisi.

«Eger áıel vaktsınanyń alǵashqy dozasyn alyp, keıin júkti ekenin bilse, qorqynyshty eshteńe joq. Oǵan ekinshi doza almaý týraly medıtsınalyq anyqtama beredi. Búgingi tańda júkti áıelderge vaktsına salý máselesi álem boınsha talqylanyp, qarastyrylyp jatyr», - dep jaýap berdi QR DSM Infektsııalyq aýrýlardy epıdemıologııalyq qadaǵalaý basqarmasynyń basshysy Roza Qojapova.

Óz kezeginde QR DSM QDSUO «Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy» fılıaly dırektorynyń orynbasary m.a. Manar Smaǵul da bul jaǵdaıda qorqýdyń qajeti joq ekenin jetkizdi.

«Eger áıel vaktsınalaýdan keıin júkti ekenin bilse, eshqandaı áreket jasaýdyń qajeti joq. Júkti áıelder óz jaǵdaıyn bilmesten vaktsına alýy múmkin. Vaktsınanyń júktilikke áser etetini týraly esh aqparat joq. Sondyqtan qoryqpańyzdar jáne eshqandaı áreket jasamańyzdar», - dedi Manar Smaǵul.

Onyń aıtýynsha, qazir AQSh-ta júkti áıelderge vaktsına salynyp jatyr.

«Bolashaqta naqty ǵylymı derekter paıda bolǵan soń, biz de osyndaı júıeni engizemiz», - deıdi M.Smaǵulova.