Vaktsınany ne úshin saldyrý kerek - dáriger pikiri
NUR-SULTAN. QazAqparat – QR Pedıatrııa jáne balalar hırýrgııasy ǵylymı ortalyǵy Hırýrgııa bólimshesiniń balalar hırýrg-dárigeri Azamat Orazalınov vaktsınatsııaǵa qatysty pikir bildirdi, dep habarlaıdy QazAqparat tilshisi.
«Vaktsınalaýdyń mańyzdylyǵy – túrli aýrýlarǵa qarsy balalardaǵy ımmýndyq jaýapty qalyptastyrý. Sebebi, balanyń ómirine qaýip tóndirip, keıde múgedektikke ákep soǵatyn dıfterııa, polıomıelıt, qyzylsha, qyzamyq syndy kóptegen aýrýlar bar. Olardy basqarylatyn aýrýlar dep te ataıdy. ıAǵnı vaktsınatsııa arqyly aýrýdy taratpaı ustap turýǵa bolady. Vaktsınalaýdyń jalpy prıntsıpi – aýrý týdyratyn bakterııalar men vırýstardy álsizdendirip, aǵzaǵa engizý arqyly, bala aǵzasynda ımmýndyq jaýap qalyptastyrý. Osylaısha, aýrýdyń ózimen betpe-bet kelgende aǵzadaǵy ımmýndyq jaýap qarsy turyp, balanyń múldem aýyrmaýyna nemese syrqattyń jeńil ótýine kómektesedi», - dedi dáriger QazAqparat tilshisine bergen suhbatta.
Onyń aıtýynsha, polıomıelıt, dıfterııa aýrýlarynyń múgedektik, ólim týdyrý qaýpi joǵary. Bul aýrýlar antıbıotıkpen emdeýge kónbeıdi, olarmen tek bala aǵzasyndaǵy ımmýndyq jaýap kúrese alady.
«Jańa týǵan balada ımmýnıtet bolmaıdy. Keıbir ımmýndyq jaýap ana sútimen keledi. Sosyn qorshaǵan ortada túrli bakterııalar men vırýstar kezdesedi. Týǵannan bastap sol bakterııalar arqyly ımmýndyq jaýap qalyptasady. Biraq, keıbir bakterııalar aýyr saldarǵa ákep soǵýy da múmkin. Sol sebepti, bala aýyrmaý úshin nemese densaýlyǵyna qaýip tóndirmeı, syrqatty jeńil ótkizý úshin ekpe saldyrý kerek», - dedi A. Orazalınov.
Dáriger ekpeden bas tartqan ata-analardyń óz balasyna jáne ózge de áljýaz balalarǵa qater tóndiretinin aıtty.
«Ekpeden bas tartqan ata-ana belgili bir jaǵdaıda balasynyń densaýlyǵyna qaýip tóndiredi. Odan bólek, Ujymdyq ımmýnıtet degen uǵym bar. Ekpe alǵan balalar kóbeıgen saıyn ujymdyq ımmýnıtet te joǵary bolady. Ol úshin balalardyń barlyǵy ekpe saldyrýy kerek. Ujymdyq ımmýnıtet 95 paıyzdan joǵary bolsa, qalǵan 5 paıyzy sol adamdar arqasynda ózin qaýipsiz sezine alady. Dúnıejúzilik densaýlyq saqtaý uıymynyń habarlaýynsha, ujymdyq ımmýnıtettiń 3-5 paıyzǵa tómendeýi qyzylsha, polıomıelıt aýrýlarynyń 3 esege ulǵaıýyna yqpal etedi. Ata-anasy ekpe saldyrmaǵan balalar bar jáne densaýlyq jaǵdaıyna baılanysty ekpe salýǵa bolmaıtyn balalar bar. Osylaısha, ekpeden bas tartqan ata-analar óz balalaryna ǵana emes, ózge balalarǵa da qaýip tóndirip otyr», - deıdi dáriger.
Sonymen birge, spıker Qazaqstanǵa jetkiziletin vaktsınalardyń qandaı tekserýden ótetinin túsindirdi.
«Qazaqstanda vaktsınalardy ǵana emes, barlyq dári-dármektiń sapasyn tekseretin, olardy qoldanýǵa ruqsat beretin arnaıy organ bar. Eń aldymen, olar vaktsınanyń sıpattamasyn tekseredi. Ekinshiden, vaktsına shyǵarylatyn zaýytqa baryp, ony shyǵarý barysymen tanysady. Sosyn vaktsınanyń ruqsat qaǵazdaryn qalaı alǵanyn, klınıkalyq zertteýdiń qandaı nátıje bergenin qaraıdy. Oǵan qosymsha Qazaqstandaǵy aınalymǵa engizbeı turyp, óz zerthanalarynda tolyq zertteýlerden ótkizgen soń ǵana ruqsat beredi. Qazaqstanǵa jetkiziletin vaktsınalar Eýropadan, Ulybrıtanııadan, AQSh, Koreıa syndy damyǵan elderden jetkiziledi. Bul, barshaǵa qoljetimdi ashyq derekterde kórsetilgen», - dedi Azamat Orazalınov.
