Vaktsınalaýǵa qatysty Prezıdent tapsyrmalary oryndalady – Alekseı Tsoı

NUR-SULTAN. QazAqparat – Vaktsınalaýǵa qatysty Memleket basshysynyń tapsyramalary oryndalady. Bul týraly QR Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Prezıdent Qasym-Jomart Toqaev siz basqaryp otyrǵan vedomstvonyń jumysyn synǵa aldy. Osy oraıda qandaı kemshilikter bolǵanyn atap óte alasyz ba?», - dep surady tilshi Ortalyq kommýnıkatsııalar qyzmetindegi baspasóz máslıhatynda.

Óz kezeginde Alekseı Tsoı Memleket basshysy negizgi ekpindi vaktsınalaý merzimine qatysty qoıǵanyn aıtty.

«Árıne, el ishine vaktsınany jetkizý úshin barynsha kúsh-jigerimizdi salyp otyrmyz. Osy oraıda naryqta barsha vaktsınalar qoljetimsiz bolyp turǵanyn taǵy bir márte atap ótkim keledi. Qazir osy vaktsınalar erkin saýdaǵa shyǵarylmaǵan. Bizdiń maqsatymyz – bul vaktsınalardyń jetkizilýin barynsha jyldamdatý úshin kez kelgen resýrstardy tabý. Bul jetkizimder boıynsha problemalar bar, alaıda aqpan aıynan bastap Qazaqstanda bar kólemmen vaktsınalaýdy bastadyq», - dedi mınıstr.

Osy oraıda ol vaktsına saldyrýdyń nusqaýlyqtary óte durys jasalǵanyn, ıaǵnı qajetti jumystar kezeń-kezeńmen atqarylyp jatqanyn aıtty.

«Qazir halyqtyń senimi artyp, ekpe jasatýǵa nıetti adamdar kóbeıdi. Árıne, vaktsınanyń naryqqa erkin shyǵarylmaýy tek Qazaqstan úshin ǵana emes, sonymen qatar bizdiń kórshiles elder úshin de problema bolyp tur. Biz barynsha jyldamdatyp, Memleket basshysynyń tapsyrmalaryn oryndaıtyn bolamyz», - dedi A. Tsoı.

Eske sala keteıik, koronavırýs indetine qarsy is-qımyl jónindegi jıyn barysynda QR Prezıdenti Qasym-Jomart Toqaev Densaýlyq saqtaý mınıstri Alekseı Tsoıdyń jumysyna kóńili tolmaıtyndyǵyn ashyq aıtty.

Memleket basshysy vaktsına jaıynda tıimsiz kommertsııalyq jáne qarjylyq sharttarǵa qatysty pikir bildirgen edi.