Vaktsınalaý karantındi jeńildetýge kómektesetin jalǵyz utymdy ádis - ımmýnolog
ALMATY. QazAqparat- S. Asfendııarov atyndaǵy QazUMÝ jalpy ımmýnologııa kafedrasynyń meńgerýshisi Elmıra Bıtanova qala turǵyndaryn ekpe alýǵa shaqyrdy, dep habarlaıdy QazAqparat tilshisi.
Medıtsına ǵylymdary kandıdatynyń aıtýynsha, vaktsınalaý – bul ózińiz ben jaqyndaryńyzdy COVID-19-dan qorǵaýdyń eń senimdi ádisi. Jappaı vaktsınalaýdyń naqty úlgisi Izraılde boldy, onda halyqtyń 80%-y ekpe saldyrǵan jáne qazir kóshelerde maskasyz júrýge bolady.
Elmıra Bıtanova Almatyda ótken jyly jaz kezinde koronavırýstyń taralǵan qarqynyn eskere otyryp, osy kóktemde árbir kámelet jasyna tolǵan turǵynǵa Izraıldegideı vaktsınatsııa týraly oılaý qajet ekenin atap ótti. Bul el turǵyndardy ımmýndyq qorǵanyspen qamtamasyz ete otyryp, jappaı vaktsınatsııa boıynsha álemde kósh bastap tur.
«Izraılde, birinshi kezekte, táýekel tobyndaǵy eldiń 55-60 jastan asqan turǵyndaryna, sonymen qatar, aýrýdyń barysyn qıyndatýy múmkin degen syrqattary bar adamdardyń bárine ekpe saldyra bastaǵan», - deıdi Elmıra Bıtanova.
Immýnolog pandemııany tek vaktsınatsııa kómegimen jáne karantın sharalaryn saqtaý arqyly ǵana jeńýge bolatynyn aıtyp, tolyqtyrdy.
«Bireýiniń ekinshisine kómegi bolady. Vaktsınatsııa karantın sharalaryn jeńildetýge kómektesetin jalǵyz utymdy ádis. Árıne, ol popýlıatsııalyq ımmýnıtettiń qamtylýy men deńgeıine baılanysty bolady», - dep jalǵastyrdy spıker.
Aıta keteıik, Almatyda 2021 jyldyń basynan beri KVI juqtyrýdyń 46 251 jaǵdaıy, ótken táýlikte – 665 adamnan vırýs anyqtaldy. Táýliktik ósim 1,4-ti quraıdy. Almatynyń COVID-19-dy emdeıtin statsınoarlaryndaǵy tósek-oryndardyń 62,2%-y, jansaqtaý bólimindegi tósek oryndardyń 54,4%-y bos emes. Barlyǵy 4014 adam statsıonarlyq em alýda. Almaty qalasynyń ákimdigi medıtsınalyq jaǵynan eshqandaı keri belgileri joq barlyq qala turǵyndaryn KVI-ge qarsy ekpe saldyrýǵa shaqyrady.
Vaktsına alý tegin.
