Vaktsınalaý: Elordada aýqymdy túsindirý jumystary júrgizilmek
NUR-SULTAN. QazAqparat – Nur-Sultan qalasy ákiminiń orynbasary Baqtııar Mákenniń tóraǵalyǵymen koronavırýs ınfektsııasynyń paıda bolýy men taralýyna jol bermeý jónindegi komıssııanyń otyrysy ótti. Bul týraly QazAqparat ákimiktiń baspasóz qyzmetine silteme jasap habarlaıdy.
Keńes barysynda elordada koronavırýs ınfektsııanyń taralýyna jol bermeý, KVI-ge qarsy vaktsınatsııa, sondaı-aq jospardan tys tekserýler júrgizý máseleleri talqylandy.
Elordanyń bas memlekettik sanıtarlyq dárigeri Sarhat Beısenovanyń aıtýynsha, qalada koronavırýstyq ınfektsııanyń tirkelgen jaǵdaılarynyń sany kúnine 70-ten 143-ke deıingi aralyqty quraıdy. Sońǵy aptadaǵy syrqattanýshylyq deńgeıi aldyńǵy aptamen salystyrǵanda 9,9%-ǵa joǵary.
«Koronavırýs ınfektsııasyn tirkeýdiń negizgi sebepteri turǵyndardyń karantındik sharalardy saqtamaýy bolyp sanalady, ıaǵnı adam kóp jınalatyn oryndarǵa barý, betperde taqpaý, patsıenttermen jaqyn baılanysta bolǵan adamdardyń úı karantıni rejımin saqtamaýy», - dep túsindirdi elordanyń sanıtarlyq dárigeri.
Oqý jylynyń basynan bastap Nur-Sultan qalasy boıynsha barlyǵy 89 mektep karantınge jabyldy. Búginde 22 mektepte karantın jalǵasyp jatyr.
Qazirgi ýaqytta qalada kúnine 12 955 zertteý qýaty bar 24 zerthana jumys isteıdi. Onda táýligine ortasha eseppen 3500-den 6000-ǵa deıin zertteý júrgiziledi.
Sonymen qatar, 12 naýryzdaǵy jaǵdaı boıynsha KVI-ǵa qarsy vaktsınanyń 1 komponentimen 5 256 adam egildi, onyń ishinde 3 281-i – medıtsına qyzmetkeri, 877-si - pedagog, 272-si – TJM, Qorǵanys mınıstrligi, UQK, ІІM, QR MKQ jáne t.b. qyzmetiniń mamandary, 2 komponent 1 901 medıtsına qyzmetkerine engizildi.
2021 jylǵy 1 qańtardan bastap sanıtarııalyq-epıdemıologııalyq baqylaý basqarmasyna barlyǵy 287 shuǵyl habarlama kelip tústi, olardyń negizinde 280 jospardan tys tekserý júrgizildi, 60,5 mln teńgeden astam somaǵa 261 jeke jáne zańdy tulǵa ákimshilik jaýapkershilikke tartyldy.
Keńes barysynda elorda «qyzyl aımaqqa» engenine qaramastan jeke tulǵalar men kásipkerlik sýbektileri bas memlekettik sanıtarlyq dárigerdiń buqaralyq is-sharalardy ótkizýge tyıym salý týraly Qaýlysynyń talaptaryn saqtamaıtyny atap ótildi.
Jıyn sońynda Baqtııar Máken qalanyń Qoǵamdyq densaýlyq saqtaý basqarmasyna, sondaı-aq múddeli memlekettik organdardyń bárine halyqty erikti túrde vaktsınatsııalaý boıynsha keń aýqymdy túsindirý jumystaryn júrgizýdi tapsyrdy.
«Epıdbaqylaý departamentine koronovırýstyq ınfektsııaǵa qarsy is-qımyl boıynsha baqylaý jáne qajetti sharalardy ýaqtyly qabyldaý jónindegi is-sharalardy jalǵastyrýdy tapsyramyn», - dep túıindedi elorda ákiminiń orynbasary.
