Vaktsınalanǵan atyraýlyqtar 3 aı utys oıyndaryna qatysady - oblys ákimi
NUR-SULTAN. QazAqparat – Atyraý oblysynda vaktsınalaý jumystarynyń qarqynyn arttyrý úshin 3 aı boıy aqshalaı sertıfıkattar utysqa qoıylady. Oblys ákimi Mahambet Dosmuhambetov Úkimet otyrysynda osyndaı málimet aıtty, dep habarlaıdy QazAqparat.
«26 maýsymnan bastap koronavırýstyń tirkelýi joǵarylap, óńir «qyzyl» aımaqqa ótti. Sońǵy táýlikte indetti juqtyrýdyń 66 jaǵdaıy anyqtalyp, reprodýktıvtik koeffıtsıenti 1,27-ge jetti. Jaǵdaıdy turaqtandyrý úshin bas sanıtar dárigerdiń qaýlysymen 28 maýsymnan bastap Atyraý oblysy boıynsha karantındik shekteý sharalary kúsheıtilip, «Teńiz» ken ornyndaǵy karantın uzartyldy», - degen ákim óńirdegi ınfektsııalyq statsıonarlardyń júktelimi týraly da aqparat berdi.
«Oblysta ınfektsııalyq tósek-oryn sany – 2098. Júkteme – 346 naýqas nemese 16,5 paıyz. Bul birinshi maýsymdaǵy jaǵdaımen salystyrǵanda 21 paıyzǵa tómen. Óńirde 81 reanımatsııalyq tósek-oryn bar. Onda 25 naýqas emdelýde, júkteme – 31 paıyz. Bul birinshi maýsymdaǵy jaǵdaımen salystyrǵanda 10 paıyzǵa tómen. Budan bólek qosymsha 750 oryn ázirlendi. Onyń 57-si reanımatsııalyq oryn. Búginde 347 naýqas ambýlatorııalyq em qabyldaýda. Ol mamyr aıynyń sáıkes kezeńimen salystyrǵanda 45 paıyzǵa tómen. Úıde em alyp jatqan naýqastarǵa 26 mobıldik brıgada baqylaý jasaýda», - deıdi Mahambet Dosmuhambetov.
Ákimniń aıtýynsha, shildeden bastap óńirde 3 aı boıy vaktsına alýshylar arasynda utys oıyndary uıymdastyrylmaq. Oǵan qajet aqshalaı sertıfıkattardy demeýshiler usynady.
«Óńirge birinshi komponenttiń 120 200 dozasy, ekinshi komponenttiń 117 200 dozasy jetkizildi. Birinshi komponent 81 861 adamǵa, ekinshi komponent 44 827 adamǵa salyndy. Vaktsınalaý qarqyny artyp keledi. Ótken aptada aldyńǵy aptamen salystyrǵanda ekpemen qamtylǵandar sany 41 paıyzǵa ósip otyr. Jalpy ekpe jumystaryn júrgizý úshin oblys boıynsha 41 egý kabıneti ashyldy. Onyń 10-y – jyljymaly pýnkt. Demeýshilerdiń kómegimen 30 maýsymnan bastap aldaǵy 3 aı kóleminde ekpe alýshylar arasynda aqshalaı sertıfıkattardyń utysy uıymdastyrylady. Bul týraly BAQ-ta búginnen bastap keńinen jarııalanady. Shara vaktsına alýshylardyń artýyna oń serpin beredi dep otyrmyz», - dedi Atyraý oblysynyń basshysy.
