Vaktsınaǵa qarsy úgit júrgizetin qoldan qurylǵan toptar bar - professor
ALMATY. QazAqparat – Qazaqstannyń klınıkalyq jáne irgeli medıtsına akademıgi, Asfendııarov atyndaǵy QazUMÝ epıdemıologııa kafedrasynyń professory, Qazaq medıtsınalyq úzdiksiz bilim berý ýnıversıtetiniń professory Sáken Ámireev onlaın brıfıng barysynda vaktsınatsııaǵa senimsizdik tanytý durys emes ekenin aıtty, dep habarlaıdy QazAqparat tilshisi.
Professor vaktsınanyń tıimdiligine senbeıtinderge júgindi. Onyń aıtýynsha, sheshekke qarsy vaktsına jasaý kezinde de oǵan qarsy shyqqandar bolǵan. Alaıda, jappaı vaktsınatsııanyń arqasynda ǵana sheshek aýrýyn jeńý qoldan keldi.
«Vaktsınatsııaǵa senimsizdik tanytý jasandy túrde qoldan jasalyp otyr. Ekpege qarsy úndeıtin toptar bar. Ondaı adamdar 1790 jyldary aýrý taraǵan kezde de bolǵan. Qazir de vaktsınaǵa qarsy shyǵatyndar bar. Degenmen kóptegen indetti bastan ótkizgen el retinde buǵan túsinistikpen qaraýymyz kerek. Jalpy adamzat soǵystan emes, túrli ınfektsııalyq aýrýdan kóp ólgen. Sondyqtan vaktsına alýdan qoryqpaýymyz kerek», - dedi ol.
Sonymen qatar, ol Qazaqstanda bala týǵanda birneshe vaktsına salynatynyn atap ótti. Buryn týberkýlezge qarsy vaktsına birneshe ret salynyp kelse, qazir eki ret qana salynady eken. Al koronavırýsqa qarsy vaktsınanyń eki dozasyn salýǵa ruqsat berilgen.
«Koronavırýspen aýyryp-jazylǵan adamdar vaktsınatsııa alýdy keshiktirmeýi kerek, óıtkeni olardyń antıdeneleri vaktsınatsııa alǵannan keıingi sııaqty kúshti bolmaıdy. Shyndyǵynda, basqa aýrýlarda adamdarda ımmýnıtet qalyptasady, biraq koronavırýs jaǵdaıynda olaı emes. KVI aýrýynan keıin jaqsy ımmýnıtet qalyptaspaıdy. Kóptegen qazaqstandyqtar aýyr formasymen aýyrdy, bul klınıkalyq turǵydan dáleldendi. Mundaı adamdar qaıtadan juqtyrýlary múmkin, olardyń ınfektsııadan keıingi qorǵanys antıdeneleri álsiz keledi. Olar jad jasýshalary qalyptasady, biraq sonymen birge antıdeneler azaıady. Ázirge búkil álemdik qaýymdastyq vaktsınany eki ret engizý kerek degenge toqtady», - deıdi Sáken Ámireev.
