Vaktsınaǵa qarsy shyǵyp, keıin oıyn ózgertken kópbalaly ananyń áńgimesi
Kópbalaly ana Zıýar Jumanova osy ýaqytqa deıin vaktsına saldyrýǵa qarsylyq bildirgenderdiń biri. Óıtkeni, qysta tumaýǵa qarsy ekpe alǵan kezinde aýrýyn asqyndyryp alǵan.
«Adam aýyrǵan kezde ekpe salǵanda onyń áseri qatty eken. Onyń ústine áleýmettik jelide túrli aqparattar bar. Sony oqyp, bilgennen soń adam batyly barmaıdy eken. Kádimgideı oılanyp qalasyń, «vaktsına arqyly bizdi óltireıin dep jatyr ma» degen sekildi. Vaktsınaǵa qatysty túrli aqparattar jan-jaqtan kelip jatady. Onyń ishinde «adamdardyń dene múshesin satady» degen aqparatta bar, soǵan sendim. Biraz adam birigip jelide vaktsınaǵa qarsy chat ashtyq, maqsat – vaktsınaǵa qarsy shyǵý. Sebebi vaktsınanyń qaýiptiligine qatysty jalǵan aqparattar kóptep kelip tústi, qaısysyna senerińdi bilmeısiń. Sodan Báıterektiń qasynda vaktsınaǵa qarsy aktsııa uıymdastyrdym, biraq onda menen basqa eshkim bolmady», - dedi Z. Jumanova.
Kópbalaly ananyń aıtýynsha, vaktsına saldyrýǵa degen qarsylyǵyn eshkim qoldamaǵan.
«Úlken ulym áskerde, basynda vaktsına alýyna qarsy boldym. Degenmen ekpeni aldy jáne qazir bári durys ekenine kózim jetti. Kerisinshe ulymnyń densaýlyǵy jaqsara túsken sekildi kórindi. Búginde meniń qaıyn jurtymnyń bári birdeı vaktsına aldy. Bastysy jaqyndarym din-aman, soǵan qýanamyn. Qazir vaktsına alýǵa qarsy emespin. Sebebi indettiń zardabyn shekkenderdiń zaryn óz kózimmen kórdim. Sodan keıin aıaǵymdy tarttym. Vaktsınaǵa qatysty kózqarasymdy ózgerttim, vaktsına alǵan jaqyn jaqyndarymnyń bári aman-esen», - deıdi ol.
