Vaktsınadan kóz jumdy delingen 2 adamǵa qatysty tergeý áli júrip jatyr – basqarma
ALMATY. QazAqparat - Almaty qalalyq qoǵamdyq densaýlyq basqarmasy basshysy orynbasarynyń mindetin atqarýshy Laýra Myrzaǵalı onlaın brıfıngte «vaktsınadan kóz jumǵan» delingen eki adam týraly aıtty, dep habarlaıdy QazAqparat tilshisi.
Onyń aıtýynsha, ol adamdardyń naqty neden qaıtys bolǵany áli belgisiz. Sondyqtan adamlardyń ólimine vaktsına áser etti dep aıtý áli erte.
«Qazirgi ýaqytta atalǵan derek boıynsha tergep- tekserý jumystary júrgizilip jatyr. Olar vaktsınadan kóz jumdy dep aıtýǵa áli erte. Qorytyndy osy jyldyń maýsym aıynda daıyn bolýy kerek. Sol kezde sebebin, aıtatyn bolamyz»,-dedi ol.
Eske salaıyq, sáýir aıynda №4 perzenthana qyzmetkeri vaktsınatsııadan keıin qaıtys bolǵany týraly jazǵan bolatynbyz.
Keıin 42 jastaǵy almatylyq Baqytjan Nurtazınniń ólimi jaıly aqparat tarady. Ol 21 kúnnen keıin vaktsınanyń ekinshi komponentin alǵan.
Aldyn ala boljamdarǵa sáıkes, ol jedel júrek-qantamyr jetispeýshiliginen qaıtys bolǵan. Qazir naqty sebepterin anyqtaý úshin tergeý júrgizilip jatyr, sot-medıtsınalyq saraptama bastaldy. Naqty dıagnoz gıstologııalyq zertteýden keıin belgili bolady.
