Vaktsınadan keıin koronavırýsqa qarsy ımmýnıtet eki jylǵa deıin sozylýy múmkin - maman
QARAǴANDY. QazAqparat – Pandemııamen kúresý úshin ujymdyq ımmýnıtetti qalyptastyrý qajet. Buǵan tek vaktsınatsııa arqyly qol jetkizýge bolady. Bul týraly Qaraǵandy medıtsına ýnıversıtetiniń qaýymdastyrylǵan professory, ınfektsıonıst-dáriger Anna Knaýs aıtty, dep habarlaıdy QazAqparat tilshisi.
Spıkerdiń aıtýynsha, koronavırýspen aýyratyn naýqastarda aýrýmen kúresýge yqpal etetin jady jasýshalary bar bolǵany 3-6 aıǵa belsendi bolady. Sodan keıin olar deneni qorǵaýdy toqtatady, sondyqtan koronavırýs qaıtalanady nemese kovıdtiń uzaq aǵymynyń qubylystary paıda bolady.
«Bizdiń aǵzamyz koronavırýspen ózdiginen kúresip, bizdi aýrýdan qorǵaıtyn jetkilikti mólsherde jasýshalar jasaı almaıtyny belgili boldy. Biz áli ujymdyq ımmýnıtetke qol jetkize almadyq. Mundaı jaǵdaılarda vaktsınatsııanyń qajettiligi aıqyndaı túsedi. ıAǵnı, biz vaktsınalardy engizý arqyly jasandy ımmýnıtetti qurý kezeńine kóshtik», - deıdi Anna Knaýs Óńirlik kommýnıkatsııalar qyzmetiniń alańynda ótken brıfıng barysynda.
Vaktsına jasaý tehnologııasy búkil álemde birdeı. Nólden bastap birde-bir el vaktsına jasaǵan emes.
«Vaktsınalardyń maqsaty birdeı. Olardyń barlyǵy koronavırýspen kúresýge baǵyttalǵan. Gamaleıa ınstıtýtynyń málimeti boıynsha, Spýtnık V vaktsınasynyń birinshi komponentin alǵannan keıin bizdiń aǵzamyzda 3-6 aıǵa deıin áreket etetin qorǵanys jasýshalarynyń alǵashqy qory jasaqtalady. Tolyq vaktsınatsııadan keıin qorǵanys tosqaýyly eki jylǵa deıin sozylýy múmkin», - dedi Anna Knaýs.
