Vaktsınatsııanyń arqasynda ómir súrý uzaqtyǵy 60-tan 74 jasqa deıin uzardy - rektor
«V.M. Behterev atyndaǵy Ulttyq medıtsınalyq psıhıatrııa jáne nevrologııa zertteý ortalyǵynyń» psıhıatrııa jáne shekaralyq buzylýlardy emdeý bóliminiń bas ǵylymı qyzmetkeri Vsevolod Rozanovtyń aıtýynsha, stress jaǵdaıynda keıbir adamdarda fantastıkalyq nemese mıfologııalyq oılaý qabileti kúsheıedi.
«Árıne, vaktsınaǵa qatysty qıyndyqtar bar, biraq biz tutas adamzat týraly oılanýymyz kerek. Qazir adam óziniń jaıly jaǵdaıynyń buzylmaýyn qalaıdy. Biraq biz egoızm, egotsentrızm aýyr synaqqa ushyraǵan jaǵdaıǵa tap bolyp otyrmyz. Biz tabıǵattyń bir bóligi ekenimizdi, keıde onda ártúrli jaǵdaılar oryn alatynyn túsinýimiz qajet. Árdaıym eń nashar jaǵdaıǵa daıyn bolýymyz qajet. Men muny biz qazir osyndaı tendentsııa júrip jatqanyn túsinýimiz úshin aıtyp otyrmyn», - dedi ol.
QazUMÝ rektory Talǵat Nurǵojın vaktsınatsııa mıllıardtaǵan adamnyń ómirin saqtap qalǵanyn atap ótti.
«Qazaqstanda vaktsınatsııanyń arqasynda ómir súrý uzaqtyǵy 60 jastan 74 jasqa deıin uzardy. 21 ǵasyrdyń kez kelgen ınnovatsııalyq tehnologııasy mıllıondaǵan adamnyń ómirin saqtaıdy. Biraq, vaktsınatsııa mıllıardtaǵan adamdy qutqarady. Bul vaktsınanyń qandaı paıdasy bar ekenin túsiný úshin jetkilikti. Bizdiń ýnıversıtettte oqytýshylar da, basqa qyzmetkerler men stýdentter de 100 paıyz ekpe saldyrdy. Biz olardy yntalandyrmadyq, biz dáriger retinde ózimiz úlgi kórsetsek, onda halyq senim bildiretinin túsinemiz. Osynda bilim alatyn balalardyń arqasynda 100 paıyz ekpe aldyq jáne oflaın rejımde oqyp jatyrmyz», - dedi ol.
Psıhıkalyq densaýlyq salasynda jumys isteıtin mamandar qaýymdastyǵynyń prezıdenti Saǵat Altynbekov vaktsınatsııa búkil adamzattyń ómir súrýi úshin qajet ekenin alǵa tartty.
«Ekpe saldyrý - álemdi aman alyp qalý úshin mindetti shart. Reseıdiń de, Qazaqstannyń da óz ekpesi bar, sóıtip joly boldy. Bizde vaktsınanyń 4 túri bar, olar tegin. Halyqta buǵan úırendi - ári tegin. 4 mıllıon Pfizer vaktsınasy satyp alyndy. Olar balalar men júkti áıelderdiń deni saý bolsyn degen maqsatta alyndy. Bul - bizdiń salyq tóleýshilerdiń aqshasy. Biz oǵan sanaly túrde baramyz. Táýelsiz Qazaqstannyń ómir súrýin qalasaq, onda memleket jasap jatqan barlyq ıgilikti durys qabyldaýymyz qajet», -dedi ol.
«Mentaldy densaýlyq jáne COVID-19» konferentsııasynda Qazaqstan, Reseı, Túrkııa, Ózbekstan, Qyrǵyzstan, Ázirbaıjan, Tájikstan, Bolgarııa, Polsha jáne Lıtvanyń úzdik mamandary sóz sóıledi.
Aıta keteıik, atalmysh konferentsııany Qazaqstan Respýblıkasy Densaýlyq saqtaý mınıstrliginiń psıhıkalyq densaýlyq ǵylymı-tájirıbelik ortalyǵy, Reseı Federatsııasy Densaýlyq saqtaý mınıstrliginiń V.M. Behterev atyndaǵy psıhıatrııa jáne nevrologııa Ulttyq medıtsınalyq zertteý ortalyǵy jáne psıhıkalyq densaýlyq salasynda jumys isteıtin mamandar qaýymdastyǵy jáne QazUMÝ túlekteriniń qaýymdastyǵy birlesip uıymdastyrdy.
