Vaktsınatsııanyń 1-kezeńi: Elordada 6 300 adam ekpe alady
NUR-SULTAN. QazAqparat – Koronavırýsqa qarsy vaktsınalaýdyń 1-kezeńinde elordada 6 300 adam ekpe alady. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Tımýr Muratov aıtty, dep habarlaıdy QazAqparat tilshisi.
«Ótken aptada reseılik Sputnik-V vaktsınalary jetkizildi. Keshe basqarma qoımalaryna algashqy partııa taratyldy. Preparat - eki komponentti, úsh apta merziminde eki ret eńgiziledi. Halyqty COVID-19-qa qarsy jappaı vaktsınatsııalaýǵa daıyndyq kezinde alǵashqy medıtsınalyq-sanıtarlyq kómek uıymdaryna 22 muzdatqysh qondyrǵy satyp alyndy, temperatýra rejımi mınýs 18 gradýstan kem emes. Jabdyqtar 19 aqpanda jetkiziledi dep kútiledi», - dedi ol Ortalyq kommýnıkatsııalar qyzmetindegi baspasóz máslıhatynda.
Basqarma tóraǵasynyń aıtýynsha, qalalyq emhanalar vaktsınalardy qoımadan ekpe saldyratyn mekemelerge tasymaldaýǵa arnalǵan 20 muzdatqysh jáne 82 jylý konteınerimen qamtamasyz etilgen. Bastapqy kezeńde vaktsınatsııa №2, №4, №6, №7, №9 qalalyq emhanalarda júrgiziledi.
«Birinshi kezeńde táýekel tobyna jatatyn medıtsına qyzmetkerleri, atap aıtqanda, juqpaly aýrýlar aýrýhanalary, jedel-járdem, alǵashqy medıtsınalyq kómek kórsetý uıymdary, kópsalaly aýrýhanalardyń qabyldaý bólimderi qyzmetkerleri vaktsınalanady. Odan ári muǵalimder, polıtsııa qyzmetkerleri, Qorǵanys mınıstrligi, Іshki ister mınıstrligi jáne osylaısha kezeń-kezeń boıynsha barlyq halyq qamtylady. Búgingi kúni alǵashqy medıtsınalyq-sanıtarlyq kómek uıymdarynda emshara bólmeleri men kútý bólmeleri ázirlengen. Onda ekpe alǵan adamdar vaktsınatsııadan keıin 30 mınýt ishinde fızıkalyq ara-qashyqtyq talaptaryna sáıkes dárigerdiń baqylaýynda bolýy kerek», - dedi Tımýr Muratov.
Onyń atap ótýinshe, turǵyndardyń ımmýndaý jáne vaktsınatsııa týraly suraqtaryna jaýap berý úshin senim telefondary uıymdastyrylǵan. Ekpe salý boıynsha patsıenttiń baǵyt-baǵdary ázirlengen.
«1-kezeńde vaktsınalaýǵa jatatyn kontıngenttiń tizimderi daıyndaldy. Bul – 6 300 adam. Olardyń arasynda ekpe salýǵa jatpaıtyn adamdar bolýy múmkin. 150 medıtsınalyq qyzmetker COVID-19 qarsy vaktsınatsııaǵa daıyndyq jáne júrgizý jumystary boıynsha oqytyldy», - dedi basqarma basshysy.
