Vaktsınatsııadan keıin koronavırýs qandaı jaǵdaılarda juǵýy múmkin
NUR-SULTAN. QazAqparat – Respýblıkalyq dıagnostıkalyq ortalyqtyń klınıkalyq ımmýnologııa, allergologııa jáne pýlmonologııa bóliminiń meńgerýshisi, medıtsına ǵylymdarynyń doktory Elena Kovzel vaktsına alǵannan keıin qandaı jaǵdaılarda koronavırýs juqtyrý múmkin ekenin aıtty, dep habarlaıdy QazAqparat tilshisi.
«Árıne, vaktsınatsııadan keıin juqtyrý múmkindigi bar. Vaktsınalyq jaýap degeniń ózi salystyrmaly uǵym. Keıbir adamdarda ımmýndyq reaktsııa kúshti, al basqalarynda álsiz bolady. Eger vaktsınatsııadan keıin jetkilikti ımmýndyq qabilet paıda bolmasa, árıne, juqtyrý qaýpi bar. Eger naýqasta ortasha ımmýndyq jaýap paıda bolsa, biraq vırýstyń shabýyly kúshti bolsa, bul jaǵdaıda da ınfektsııa juǵýy múmkin. Biraq biz vaktsınatsııadan keıin vırýstyń shabýyly báseńdeıtin shyǵar dep otyrmyz», - dedi medıtsına ǵylymdarynyń doktory.
Onyń aıtýynsha, ınfektsııanyń juǵý qaýpi aǵzanyń kúıine baılanysty.
«Mysaly, ınfektsııa shabýyldaǵan kezde adam taǵy bir vırýstyń shabýylyna qatar ushyrady nemese basqa bir aýrýdyń órshýine baılanysty hımıoterapııa alyp júrgen kezge tap keldi deıik. Mundaı jaǵdaıda vaktsına týdyrǵan ımmýndyq qabilet biz kútken qorǵanys bere almaýy múmkin», - dedi Elena Kovzel.
