Vaktsınatsııadan bas tartqany úshin aıyppul salynady - feık
NUR-SULTAN. QazAqparat - Telegram messendjerinde qazaqstandyqtar bir-birin COVID-19 qarsy vaktsınatsııadan bas tartqany úshin aıyppul salynatyny týraly eskertýde. Mundaı sharalar aǵymdaǵy jyldyń sońynda qabyldana bastaıdy eken. Bul feık. Bul týraly QazAqparat stopfake.kz saıtyna silteme jasap habarlaıdy.
QR Densaýlyq saqtaý mınıstrligi májbúrli vaktsınatsııa jáne odan bas tartqany úshin aıyppuldar salynatyny týraly aqparatty joqqa shyǵardy.
« Bizde májbúrli vaktsınatsııa joq jáne bolmaıdy da. Biz bul týraly birneshe ret aıttyq. Mundaı habarlamalar – jalǵan aqparat bolyp tabylady « , – dep habarlady vedomstvodan.
Ekpeden bas tartqany nemese vaktsına alýǵa májbúrlegeni úshin aıyppul salý QR zańnamasyna qaıshy keledi. «Halyq densaýlyǵy jáne densaýlyq saqtaý júıesi týraly Kodekstiń» 77-babyna sáıkes Qazaqstannyń árbir azamaty «emdelýge jáne basqa da medıtsınalyq aralasýlardy, onyń ishinde profılaktıkalyq ekpelerdi júrgizýge habardar etilgen kelisim berýge nemese olardan bas tartýǵa» quqyly.
Barshańyzdy tek resmı aqparatqa ǵana senýge shaqyramyz! Jańalyqtyń shynaıylyǵyn bizdiń portaldyń kómegimen tekserýge bolady. Ózińizdi qyzyqtyrǵan aqparatty t.me/stopfake_kz Telegram-arnasyna nemese:+7 707 739 5599 WhatsApp nómirine jiberińiz.
