Vaktsınatsııadan bas tartqandarǵa aıyppul salyna ma

ASTANA. QazAqparat - Buǵan deıin QR Din isteri jáne azamattyq qoǵam mınıstrligi vaktsınatsııadan bas tartqandarǵa 10 AEK (22 690 teńge) kóleminde bir rettik aıyppul salýdy usynǵan bolatyn.

 Alaıda QR Densaýlyq saqtaý mınıstrligi atalǵan usynysty qoldaǵan joq, dep habarlaıdy QazAqparat tilshisi.

"Kostıtýtsııada " tegin medıtsınalyq kómektiń kepildendirilgen kólemi - ol kez kelgen adamnyń quqyǵy" dep anyq jazylǵan. Bul - mindet emes, árbir adamnyń quqyǵy. Demek, Qazaqstan azamaty ony paıdalana ma, joq pa, óz erki. Sondyqtan biz aıyppul salý bastamasyn qoldaǵan joqpyz. Sebebi Konstıtýtsııa - elimizdiń basty qujaty", - dedi qoǵamdyq densaýlyq saqtaý komıteti tóraǵasynyń orynbasary Berik Shárip jýrnalısterge bergen suxbatynda.

Onyń aıtýynsha, búginde Eýropa elderinde vaktsınatsııadan bas tartqany úshin aıyppul salý tájirıbesi bar. Máselen, Italııada vaktsınanyń joqtyǵynan aýyryp qalǵan bir adamǵa ketetin em-domdy eseptep, 2-7 myń eýro kóleminde aıyppul engizdi. Vaktsınatsııasyz balabaqshaǵa da almaıdy. "Ázirshe, bizde ondaı norma joq. Biz atalǵan máseleni túsindirý jumystaryn júrgizý arqyly sheshýge tyrysyp kelemiz", - dep atap kórsetti B.Shárip.