Vaktsınatsııa: Nur-Sultanda 1 980 medıtsına mamany ekpe aldy
NUR-SULTAN. QazAqparat – Elordalyq Alǵashqy medıtsınalyq-sanıtarııalyq kómekti uıymdastyrý bóliminiń basshysy Álııa Ómirzaqova COVID-19 vırýsyna qarsy vaktsınalaýdyń aralyq qorytyndysyn aıtyp berdi, dep habarlaıdy QazAqparat tilshisi.
«Búgingi tańda elordamyzda vaktsınatsıynyń úshinshi aptasy aıaqtaldy. Vaktsınalaý emhanalarda, ınfektsııalyq statsıonarlardyń, jedel medıtsınalyq járdem, alǵashqy medıtsınalyq sanıtarlyq kómek uıymdarynyń, kópbeıindi statsıonarlardyń qabyldaý bólimderiniń medıtsına qyzmetkerlerine ótkizilýde. Tıisti kontıngent ishinde 6 300 adamnyń 1 980-i vaktsına aldy. Olardyń arasynda asqyný anyqtalǵan joq. Qazirgi ýaqytta vaktsınatsııa reseılik «Gam-KOVID-Vak» vaktsınasymen júrip jatyr. Preparat eki komponentti, úsh apta aralyqpen eki ret egiledi», - dedi Álııa Ómirzaqova Nur-Sultan qalasynyń ákimdiginde ótken onlaın brıfırngte.
Ekinshi komponentpen vaktsınalaý 22 aqpanda bastalady. Vaktsınatsııa tolyq kýrstan keıin bir jarym aı ishinde aǵzanyń ımmýndyq reaktsııasyn týdyrady. Sondyqtan vaktsına alǵan adamdarǵa aldyn alý sharalaryn saqtaýdy jalǵastyrý qajet.
«Vaktsınanyń kelesi jetkizilimi aqpan aıynyń sońynda kútilýde. Vaktsınanyń jańa partııasy kelip túsken ýaqytta medıtsına qyzmetkerlerin egýdi jalǵastyramyz. Sondaı-aq, pedagogtardy, kúsh qurylymdary qyzmetkerlerin, sozylmaly aýrýy barlardy jáne basqalardy kezeń-kezeńimen egýdi bastaımyz. Alǵashqy medıtsınalyq-sanıtarııalyq kómek uıymdaryna vaktsınatsııa júrgizý úshin egý kabınetteri, kútý zaldary ázirlendi. Vaktsına alǵan adamdar 30 mınýt boıy dáriger baqylaýynda bolýy tıis. Vaktsınalardy tasymaldaýǵa arnalǵan 20 muzdatqysh jáne 82 termokonteıner bar. Qosymsha 22 muzdatqysh qondyrǵy satyp alyndy. Bul qajettilikti tolyǵymen jabady. Barlyq tıisti tulǵalar koronavırýsqa qarsy vaktsınany tirkelgen emhanalarda tegin ala alady», - dedi Álııa Ómirzaqova.
