Vaktsınatsııa koronavırýstyń aýyr túrinen qorǵaıdy – maman pikiri
NUR-SULTAN. QazAqparat – Vaktsına saldyrý koronavırýstan qorǵanýǵa 100 paıyz kepil bola almaıdy. Bul týraly QR DSM «Qoǵamdyq densaýlyq saqtaý ulttyq ortalyǵy» ShJQ RMK Sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵynyń dáriger-epıdemıology Lena Qasabekova aıtty, dep habarlaıdy QazAqparat tilshisi.
«Koronavırýs ınfektsııasyna qarsy vaktsınatsııa búkil álemde, onyń ishinde bizdiń respýblıkamyzda óte ózekti problema bolyp tur. Bizdiń mindetimiz - qazirgideı qate ári teris aqparattar ýshyǵyp turǵan sátte «ekpe alý kerek pe, kerek emes pe» degen máselede halyqtyń durys sheshim qabyldaýyna kómek kórsetý», - dedi ol Ortalyq kommýnıkatsııalar qyzmetindegi baspasóz máslıhaty barysynda.
Onyń atap ótýinshe, búginde halyqtyń basym bóliginiń tym bolmaǵanda vaktsınanyń birinshi komponentin alýy mańyzdy.
«Búkil álemde vaktsına tapshylyǵy baıqalatyndyǵyn barlyǵy biledi. Biraq, osyǵan qaramastan elimizdiń turǵyndaryna vaktsınanyń úsh túri qoljetimdi bolyp tur. Biz úshin halyqtyń barynsha vaktsına alǵany mańyzdy. Al jaqsy ımmýnıtet qalyptasýy úshin vaktsınanyń ekinshi komponentin alý mańyzdy. Vaktsınatsııa koronavırýs ınfektsııasynan qorǵaýǵa kepil bola almaıdy. Vaktsına alyp, endigi ýaqytta «tolyqtaı qorǵaldym» dep júrgen adamdarǵa munyń durys emes ekendigin aıtqym keledi. Adam ekpe alsa da bul vaktsınadan 100 paıyz qorǵalmaıdy. Vaktsınatsııa koronavırýstyń aýyr túrinen, ólim-jitimnen qorǵaıdy. Tipti ekpe alǵan adamnyń ózi de aýyryp qalyp, odan ary sol vırýsty taratýshy bolýy múmkin», - dedi Lena Qasabekova.
