Vaktsınatsııa: Qaraǵandy oblysynyń saıabaqtarynda jyljymaly medıtsınalyq keshender uıymdastyrylýda
QARAǴANDY. QazAqparat – Qaraǵandy oblysynda koronavırýsqa qarsy vaktsınanyń birinshi komponentin 94 630 adam aldy. Eki komponentpen 10 873 egildi. Úkimet otyrysynda oblys ákimi Jeńis Qasymbek óńirdegi epıdemıologııalyq ahýal jáne egý naýqanynyń barysy týraly premer-mınıstr Asqar Mamınge baıandady, dep habarlaıdy QazAqparat tilshisi.
Óńir basshysynyń aıtýynsha, vaktsınatsııany múmkindiginshe qol jetimdi etý boıynsha jumystar atqarylýda. Mamyr merekelerinde jyljymaly medıtsınalyq keshender iri qalalardyń saıabaqtarynda jumys isteıtin bolady.
«Oblysta 115 egý kabıneti ashyldy, olardyń ótkizý qabileti – kúnine 8–9 myń adam. Adamdarǵa yńǵaıly bolý úshin ekpe kabınetteri tórt iri saýda ortalyǵynda ashylyp, osy aptada taǵy úsheýinde paıda bolady. Zeınetkerlerge úıge mobıldi brıgadalar keledi. Immýndaý ónerkásip kásiporyndarynda ornalasqan jerlerine baryp júrgiziledi. Mereke kúnderi, 1 jáne 9 mamyr merekelerinde, sondaı-aq demalys kúnderi halyqqa vaktsınatsııa júrgizý úshin Qaraǵandy, Temirtaý, Jezqazǵan, Balqash qalalarynyń ortalyq jáne qalalyq saıabaqtarynda jyljymaly medıtsınalyq keshender jumys isteıtin bolady», – dep habarlady Jeńis Qasymbek.
Óńir basshysynyń málimetinshe, oblys statsıonarlarynda koronavırýstyq ınfektsııasy bar 1 498 naýqas emdelýde.
