Vaktsınatsııa indetke qarsy kúreste qalaı kómektesedi
ALMATY. QazAqparat- Sanjar Asfendııarov atyndaǵy Qazaq ulttyq medıtsına ýnıversıteti juqpaly jáne tropıkalyq aýrýlar kafedrasynyń assıstenti Lázzat Ómeshova koronavırýsqa qarsy vaktsınatsııanyń mańyzy týraly aıtty, dep habarlaıdy QazAqparat tilshisi.
Onyń aıtýysha, COVID-19 - vırýstyq ınfektsııa. Sondyqtan vaktsına koronavırýs ınfektsııasyna qarsy kúreste jaǵdaıdy jaqsartýǵa kómektesedi.
Sonymen qatar, Lázzat Ómeshova álemdegi epıdemııalyq jaǵdaıdyń nasharlaýy men koronavırýs ınfektsııasynyń jańa shtammynyń taralýy aıasynda halyqty KVI-ge qarsy vaktsınalaýdyń mańyzyn atap ótti.
«Ulybrıtanııada koronavırýstyń jańa shtammy bar, ol agressıvti túrde ótýde. Bizdiń eldegi vırýs osy deńgeıge deıin mýtatsııaǵa ushyraı ma, joq pa degen suraqqa jaýap berýge qınalamyn, biraq bizdiń respýblıkamyzǵa bul shtammdy Eýropadan óz azamattarymyz ákelýi múmkin, óıtkeni qazirgi koronavırýspen de basynda osyndaı jaǵdaı bolǵan», - dedi ol.
Sonymen qatar, ol aldyn alýdyń negizgi erejelerin saqtaýdy jalǵastyrý mańyzdy ekenin tilge tıek etti.
Qazirgi ýaqytta negizgi aldyn alý sharalary mynandaı:
- maska rejımi (durys kııý jáne aýystyrý rejımin saqtaý);
- qoldy jıi jýý jáne dezınfektsııalaý arqyly jeke gıgıenany saqtaý;
- 1,5 metrden kem emes qashyqtyqty saqtaý;
- adam kóp jınalatyn jerlerden aýlaq bolý;
- COVID-19 rastalǵan adamdardy oqshaýlaý.
Sarapshynyń sózine sensek, halyqty tumaýǵa qarsy vaktsınatsııalaý sheshimi aıtarlyqtaı nátıje berdi.
«Tumaý - aýyr respıratorlyq vırýstyq ınfektsııa, ol ıntoksıkatsııanyń aıqyn belgilerimen júredi, al sońǵy jyldary pandemııalyq tumaý jaǵdaılary tirkeldi. Bul da aýyr vırýstyq pnevmonııany týǵyzady. Meniń oıymsha, memlekettiń tumaýǵa qarsy vaktsınatsııaǵa kóp qarajat bólgeni durys boldy. Eger adamdar tumaýmen qosa koronavırýspen de aýyrsa, ne bolar edi?! Elestetip kórińizshi», - dedi Lázzat Ómeshova.
Eske salaıyq, Almaty qalasynyń ákimi Baqytjan Saǵyntaevtyń tapsyrmasy boıynsha tumaý vırýsy taralýynyń aldyn alý úshin jergilikti bıýdjetten táýekel tobyndaǵy adamdardy tegin vaktsınalaý úshin «Grıppol Plıýs» vaktsınasynyń 430 000 dozasy satyp alynǵan bolatyn.
