Vaktsınatsııa bastalǵanda oǵan qarsy qozǵalystar da kúsheıe túsedi – sarapshy

NUR-SULTAN. QazAqparat – Vaktsınalaýǵa qarsy nasıhat kimge tıimdi? Bul máselege qatysty DSM Qoǵamdyq densaýlyq saqtaý ulttyq ortalyǵynyń sanıtarııalyq-epıdemıologııalyq saraptama jáne monıtorıng ǵylymı praktıkalyq ortalyǵynyń dáriger-epıdemıology, sarapshy Lena Qasabekova pikir bildirdi, dep habarlaıdy QazAqparat tilshisi.

«Búkil álemde antıvaktsınalyq qozǵalystardy belgili bir kúshter qarjylandyryp otyrady. Qazirgi tańda álemniń keı jerlerinde aldyn alý vaktsınasynan bas tartý jaǵdaılary kezdesedi. Vaktsınadan bas tartý sebebi de ártúrli. Shyntýaıtyna kelgende qandaı da bir jappaı vaktsınalaý nemese qosymsha ımmýndaý sharalary júrgizilse, mundaı uıymdardyń belsendiligi tipten arta túsedi. Sondyqtan biz osyǵan uqsas basqa da sharalardaǵydaı, osyndaı qarsylyqpen betpe-bet kelip jatamyz. Buqaralyq aqparat quraldary arqyly biz de vaktsınalaý – indetten qutylýdyń birden bir amaly ekenin barynsha túsindirgimiz keledi», - dedi Lena Qasabekova ortalyq kommýnıkatsııalar qyzmetiniń alańynda ótip jatqan baspasóz máslıhatynda.

Dáriger-epıdemıolog mamandardyń vaktsına shynynda da tıimdi ekenin naqty dáleldeıtin faktilerdi usynatynyn málim etti.

Eske sala ketsek, buǵan deıin elde naýryzdan bastap vaktsınatsııaǵa arnalǵan qosymsha ekpe kabınetteri ashylatyny habarlanǵan bolatyn.